Tura, Apr 29: West Garo Hills a·jao, mongsongbate Tura jillao gari gorarangko skatang salenganichi ramarango a·sel ong·anirang batroroengani gimin gari gora jakkalgiparangna West Garo Hills a·jani Deputy Commissioner, dingtangmancha niamrangko donataha.

Bostu salgipa truck garirangna dongimin niamrang:

1. Metric ton (MT) 9-na bate bostu salgipa truck garirangde district administration-oniko permission ra·chenggija Tura Municipal area-o napna man·jawaha.
2. MT 2.5-oni MT 9-ona bostu salgipa truck garirangba pring 6:00 bajioni attam 9:00 bajiona Tura Municipal area-o napna man·jawa aro attam 9:00 bajioni pring 6:00 bajionasan Tura jilla gita re·na man·gen. Indake ong·genchimoba sorkarini kamko ka·enggipa garirangnade dingtangmancha District Administration-ni gita watani donggen.
3. Dal·dalgipa garirangko jakkalenggipa sorkari department-rangba, an·tangtangni driver-rangna rakgipa niamrangko donna nanggen aro driver-rangna training-rangko on·aniba department-ni daitoan ong·gen.
4. Rongram, South West Garo Hills aro South Garo Hills-ona bostu salgipa garirangni re·ruraaniko nirokna gita Police-rang, Tura-ni nakuram biaprango entry gate checkpoint-rangko dongen.

West Garo Hills a·jani ning·o salruraenggipa pilak dal·dalgipa gari gorarang, Motor Vehicle Act 1988-ni ning·o bostu salna dongimin aro gariko ta·rake salna dongimin niamrangko ja·rikna nanggen.

Gari gora jakkalgipa pilak manderangan Traffic-ni niamrangko raken ja·rikna nanggen:

1. West Garo Hills a·jani ning·o gari gora jakkalenggipa pilak manderangan, Motor Vehicle Act 1988-ni ning·o dongimin niamrang, jekai motorcycle ba scooty salgiparang helmet ganani, gari salgiparang seat belt ganani, speed limit ba gariko dongimin niam gita salani aro uandakgipa niamrangko ja·rikna nanggen.
2. Walni somoio ja·achi re·gipa manderang name nikna man·na gita dal·dalgipa garirango ‘reflective strip’-ko tapna nanggen.
3. Mande salruragipa garirang, nangana bate manderangko gatna man·jawa aro traffic-ni niamrangko rake ja·rikna nanggen.
4. Bilsi 18 gapkugijagipa aro licence donggijagipa bi·sarangna gari salna on·jachina gita ma·a paarangko raken ku·pattiatenga.
5. Gari gora jakkalgiparang traffic-ni niamrangko ja·rikama ja·rikjaenga, uarangko salantian nirikkichina gita West Garo Hills a·jani Superintendent of Police, District Transport Office aro Motor Vehicle Inspector-rangna Deputy Commissioner ge·etaniko on·aha.
6. Gari gora jakkalenggipa manderang niam pe·ako rim·a man·genchimode niamo pangchake rakgipa sastirangko man·gen.
7. Manderangko salruragipa bus garirang aro skul garirang, dongimin biaprango garirangko park ka·na nanggen aro ramako re·ruraenggipa manderangna maming man·dikatani gri niamko ja·rike gariko salna nanggen.

Churing chupeke gari salaniko bilakbate nirokanggen: Churing chupeke gari salaniko champengna gita police-rang, mongsonggipa bibra (junction)-rango aro check point-rango breath analyser-rangchi gari salgipa manderangko porikka ra·e nijringgen. Chu ringe gari salako rim·a man·a ong·ode MV Act-o pangchake dairangko gamna nanggen.

Gari gora salgipa manderang niam pe·genchimode, MV Act-ni Section 19, Section 206 (4), Section 21 aro Section 22-o pangchake police-rang aro transport official-rang rakgipa ja·kurangko de·anggen aro ia niamrango pangchake driver-ni licence-ko den·galpilna bil donggen.

Gari a·sel ong·ronggipa biaprango Public Works Department (PWD), District Transport Office (DTO) baksa speed breaker, ramani chinrang aro uandakgipa nanga kamrangko ka·anggen. Manderangni ja·achi re·gipa biaprang aro junction-rango Zebra Crossing-rangko bakan District Administration, Police aro DTO baksa chanchirime donanggen.

Na·simang ia video-koba nina man·gen:

Na·simang iakoba poraina man·gen: GNLA-R-ko bikotchengdilgipa mandeko North Garo Hills-o rim•a

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter-twitter.com/nemediahub

Youtube channel- www.youtube.com/@NortheastMediaHub2020