Tura, July 15: Budbar walo, West Garo Hills a•jani police-rang, bretatna jakkalgipa adita bosturangko Anogre jolo donggipa rama sambao a•a dape donako man•aha.
“Koborko man•soani ja•mano West Garo Hills a•jani dolsa sipairang, Gabil jolona re•ange am•sandianirangko dakon, gopretna jakkalgipa bosturangko rama sambao donggipa a•ningoniko man•aha,” ine West Garo Hills a•jani Superintendent of Police (SP) VS Rathore parakataha.
SP-ni u•iatani gitade, police-rangni man•gipa bosturangara, Kg 2.25 ong•gipa Gelatin Stick (Class 2, Division-2, Cat-ZZ), Non-Electric Detonator ge 8, Electric Detonator ge 8, Clipper ge 10, Cello Tape ge 2 aro fuse (Cordtex) metre 3 ong•achim.
“Chingni chanchichipani gitade ia bosturangko dape dongipa manderang improvised explosive device (IED)-ko tarina miksongengachimkon,” ineba SP parakataha.
Iani bidingo police-rang mokordoma ka•e am•sandianirangko dakna a•bachengataha ine janapatengon, a•jao so•sojengjeng ong•anirangko champengna man•na gita iandakgipa kamrangni gimin maiba koborrangko man•genchimode ta•raken police-rangna kobor on•china SP didiataha.
