Tura, Oct 3: Meghalaya a•doko, aro mongsongbate Garo Hills-o Secondary School Leaving Certificate (SSLC) aro Higher Secondary School Leaving Certificate (HSSLC) gita dakgipa porikkarangko seanio chatro chatrirangni pass ka•anirang komiengani gimin iandakgipa neng•nikaniko namatna gita chatro chatrirangna, skigiparangna aro ma•a paarangna dakchakanirangko on•na miksonganio CM Impact program-ko Bristibar salo, Meghalaya a•dokni Chief Minister Conrad K Sangma, dingtangmancha Garo Hills-na a•bachengate on•angaha.
Ia program-ko a•bachengate on•anganio a•dokni Education Minister Rakkam A Sangma, jinmana aganprakengon, skulrango skigiparang an•tangtangni biapo gipinrangko skiatskaengani a•sel skulo poraienggipa bi•sarangna nangchakeaniko ra•baenga ine skigiparangko songsalna on•kange kam ka•china didiangaha.
Gital nakatroroenggipa technology ba kolrangko skie on•anio jakkalchina gitaba ua skigiparangko didiangaha.
Skulrango poraienggipa bi•sarang skia man•giparang ong•e dal•rorona man•na gita chatro chatrirangni gisikrango skie ra•na ka•oksianiko ong•katatchina gitaba Education Minister, skigiparangko didiangaha.
Meghalaya a•doko sak 55,000-na baten skigiparang donggenchimoba poraiani gadangrang nanga gita ong•kujaenga ine janapatengon, skie on•ani bewalko nambatatna gita sorkari jotton ka•enga ine Sangma aganaha.
Skul nokrang namjani gimin aro dingtang dingtang neng•nikanirangko chagrongna nangengani gimin janapatskaengon, an•tangtangni kamrango chu•ongnike dongaijachina aro nambatsranggipa lekka porakosa chatro chatrirangna on•china gita Education Minister, skigiparangna ku•pattiangaha.
Meghalaya a•doko SSLC porikkako pass ka•ani percentage 53 percent-na bate tang•dochipna man•kujaengani a•sel namen jajrengna nangani ong•engachim aro Garo Hills-ni mitam a•jarangode pass ka•ani percentage 25 percent-mangni gitasan ong•aiengachim.
Batanggimin bilsigittam joljol dam 36 skulrangode pass ka•ani percentage zero ong•aiahachim aro ia 2024 bilsioba dam 124 skulrangan pass ka•ani percentage-o zero ong•aiahachim.
Indake ong•engon, board porikkarango chatro chatrirang pass ka•na cholrangko man•china gita sorkari, bilsio changgni dake board porikkako ra•na tik ka•aha aro unbaksana dingtang dingtang a•jarango porikkani result-rangko namdapatna gita dingtang dingtang cholrangkoba tarienga ine Education Minister parakataha.
Ia CM Impact-ko a•bachengatanio skigiparangna guidebook-rangko sualatengon, iandake porikkarango chatro chatrirangni chu•sokna man•jaenganiko namatna gita lekka porako on•anio bak ong•enggipa pilakan tom•anirangko ong•atjringe apsan chanchirimna nangenga ine a•dokni Chief Minister aganaha.
Lekka porako on•anio chagrongna nangenggipa neng•nikanirangko namatna gita dingtang dingtang ra•bianirangko chagrongna nangkugen ine janapatengon, ia neng•nikanirangko namatna gitade miksongani baksasa apsan re•mikkangna nanggen aro iana sorkari dingtangmancha chanchisamsomanaha ine Chief Minister parakataha.
Pass percentage-ko nambatatna gita neng•nikanirangko sandichina skigiparangko didiatengon, chatro chatrirangkoba gadang suale, uamang maio bilgriengachim, uarangko sandienba uamangni mark-rangko namdapatna kam ka•china Chief Minister ku•pattiangaha.
Porikkako pass ka•na man•na gita chatro chatrirangko tarichinaba ua skigiparangko ku•pattiangaha.
Chatro chatrirang bilsisakoba gimaatgija porikkako pass ka•na man•na gita sorkari, porikkani result-ko parakaoni jagnini gisepon supplementary porikkako ong•atna tik ka•aha ineba Chief Minister aganaha.
Na·simang ia video-koba nina man·gen:
Na·simang iakoba poraina man·gen: Tura-o GREEN Meghalaya plus scheme-ko CM a•bachengate on•anga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
