Tura, Apr 16: National People’s Party (NPP)-ni candidate Agatha K Sangma, Garo Hills a•jani sak 18 MLA-rangni chakpaaniko man•genchimoba, Parliamentary seat-na pu•onanirangode apsan ong•jawa ine Trinamool Congress party-ni candidate Zenith M. Sangma parakataha.
“NPP dol Garo Hills a•ja gimikoni sak 18 MLA-rangchi chakpaaniko man•genchimoba, uamang 30% ba 40% mang vote-rangko man•giparangsan ong•aia. 60% rangde manderang NPP-na pu•onjaha. Ia changni eleksinoba apsan dake ong•aigen” ine Hub News aro The Meghalayan baksa, New Tura-o eleksinna campaign-ko ong•atengmiting somoio agangrikengon, Zenith Sangma aganaha.
Unbaksana, Assembly Constituency dam 4-o Garo Hills a•ja gimikoni sak 1,95,000 vote-rangko on•e TMC dilgiparangko seokgiparangoni aro 60% mang NPP-na pu•ongijagipa manderang gnang, indake ong•ode uamang chena ka•dongengama ineba TMC candidate sing•doataha.
Indake, ia sing•anirangna NPP party-ni dilgipa aganchakengon, sak 60% mangni gita NPP-na pu•onjaha ine TMC aganaha, apsan daken ia manderang uamangnaba pu•onjaha, ong•jaode, Garo Hills a•ja gimiko sak 24 MLA-rangoni sak 4-san mangmang man•jawachim ine aganchakatskaaha.
Indake ong•engon, NPP-na pu•ongijagipa sakantiande TMC-ona napangjawa, Agatha Sangma baksa susagriknasienggipa Congress party-ni candidate Saleng Sangma-ba gnang ine nikna man•a.
Saleng Sangma, da•alo chena gita re•baja, indiba Agatha Sangma-ni chegniko, uamangni man•gni vote-rangko ma•ekate bringbrangatnasa re•baaha, uni gimin, tom•a changantian iani bidingo chinga talataniko on•enga inenba Zenith aganaha.
Meghalaya a•dokni silroro namroroani bidingo aganengon, Agatha Sangma aro uni adatanggipa, gitcham Skotong Minister Mukul Sangma-ni a•bachengatgipa project-rang, jekai, Tura-o Governor House-ko rikani, Tura Medical College, Captain Williamson Sangma Technical University, College of Architecture aro Urban Planning ba je gipin rika cho•ani kamrangko, Conrad Sangma-sa oprake on•enba an•tangtangna nama bimungko man•atengaha ineba Sangma matnangataha.
Iani gisepon, Skotong Minister Conrad K Sangma, mingsa Project-naba tangka paisarangko ra•bagija, Mukul Sangma-kosa project-ni bimungko ra•e chi siltongrangko manderangna pale cha•aha ine matnangaha ineba ua agandapataha.
Indake, Skotong Minister Conrad Sangma-ba, ia project-rangko tangka paisani gita chama gri, bikote bimungna mangmangsan donaha, aro ia project-rangna tangka paisarangko chamatchina, ma•mong sorkari baksa changni chang tom•e chanchirimna nangaha aro kamrangko a•bachengatna chu•onga gita tangka paisarangko chamatchinaba mol•molna nangaha ine aganchakataha.
Citizenship Amendment Act-ko Meghalaya a•dokko aro Sixth Schedule-ni ning•o ga•akenggipa jolrangko watchangaha ine tol•e janapatgenchimoba manderang bebe ra•jaha, India a•songona napbae songdong a•chamanahaode, uamang jitna man•jawaha aro Assam a•dok aro Bangladesh-ni manderang da•alon an•ching a•arangko sekdrae ra•engaha ine Zenith Sangma janapataha.
TMC-ni iandake matnanganirangna, a•paloni re•bagipa aro gipin jatrang maming saloba, Sixth Schedule-ni ning•o ga•akgipa a•arangko brena man•ja aro GHADC-ni authority-rang, tribal-rangni a•ako chel•chake rakkigen ine NPP parakatskaaha.
Na·simang ia video-koba nina man·gen:
Na·simang iakoba poraina man·gen: Tinsukia-o Assam Rifles-ko chadrapaniko ULFA-I a•kanga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
