Tura, April 17: Garo Hills Autonomous District Council (GHADC) eleksino skanggipa changna Tura elakani BJP candidate Pa Bernard Marak, cheahani gimin kusi ong·bee BJP dilgiparang Tura-ona re·bae Tura Orchid Polo hotelo tom·aniko ong·ate Pa Bernard Marak aro Pa Promod Koch-maangna dingtangmancha mande ra·bee mittelpilskaaniko Sukrobar attamchibara dakangaha.
Re·anggipa 2015 bilsini GHADC eleksino South West Garo Hills a·jani Zikzak elakao BJP dolni Pa Bhupendra Hajong saksa mangmang chegipa ong·e bilsi 5-na GHADC-o dangdike on·angaha. Indake ong·engon, 2021 bilsini GHADC eleksinode BJP dol rakbate kamrangko ka·anichi saksa chedape gimik sakgni candidate-rang cheaha.
Indake ong·engon, skanggipa changna Garo Hills-o BJP dolni sakgni candidate-rang cheahani gimin kusi ong·bee, Meghalaya BJP dolni jakrikra, in-charge Pa Chuba Ao aro Meghalaya a·dokni Health Minister Pa AL Hek aro Garo Hills-ni gipin BJP dilgiparang Tura songjinmani Orchid Polo Hotelo tom·aniko ong·ate chegiparangko mande ra·aniko dakangao, “Garo Hills-o BJP dolni bilakbate aro rakbate kamrangko ka·anichi da·alo BJP-ni chu·sokna man·aniara BJP dolni dingtangmancha Garo Hills-na kam ka·anichisa ong·aha ine Pa Hek aganangaha.
BJP candidate-rang Garo Hills-ni dingtang dingtang elakarango sak 17 candidate-rang susahachim, indiba Garo Hills-ni manderang BJP dolko namnikgijagiparang bang·batani gimin sak 17 BJP candidate-rangoni sakgni mangmangsan chena gita man·aiahachim.
“Chingni BJP candidate-rang sakgni GHADC eleksino cheahanina anga namen kusi ong·a, mikkangchiba BJP dingtang dingtang eleksinrango apsan ku·monge kamrangko ka·anggen aro GHADC-na dingtanganiko ra·bagen” ine Pa Chuba Ao aganangaha.
Bangtanggimin eleksinrango BJP chena man·jahaoba manderang ia chango rakbate kamrangko ka·anichi da·alo BJP, A·chik a·songni mongsonggipa Tura elakao chena man·ahani gimin anga kusi ong·a. Uni gimin, Garo Hills-ni manderangko Pa AL Hek dingtangmancha de·mittele aganangskaaha. Mikkangchiba apsan ku·monge kamrangko ka·genchimode BJP, Garo Hills-na bang·a dingtang dingtang namroro-silroroaniko ra·bana gita kang·kare kaenga ineba Health Minister agandapangaha.
Ia GHADC eleksino chu·sokgipa BJP candidate-rang sakgnisan ong·genchimoba NPP dol baksa bakrime kamrangko kamko ka·anggen ineba health minister agandapangaha
