Tura, April 30: Garo Hills Autonomous District Council (GHADC)-o kam ka•giparang an•tangtangni dormaharangko man•tokkujaengani gimin kamrangko ka•gija jingjengatenganirangko dakengon, kam ka•giparangni dormaharangko on•na gita GHADC-ni Executive Committee rake kamrangko ka•enga aro iani bidingo a•dok sorkarina proposal-ko on•manaha ine GHADC-ni Secretary aro a•dokni Civil Service Officer Rikse R Marak, kamrangko ka•taipilchina gita GHADC-o kam ka•enggiparangko didiataha.
GHADC-o kam ka•giparang kamrangko ka•jaengani a•sel kajinarangko gile man•ronggipa krorni kror tangkarangko gimaatna nangengani gimin GHADC-o kajinarangko man•na gitade, kamrangko ka•piltaina nangenga ineba GHADC-ni Secretary parakataha.
GHADC-o kam ka•giparangna dormaharangko on•jaengani gimin dingtang dingtang dolrangni matnanganirangna aganchakaniko on•angengon, GHADC-o kam ka•giparang ta•raken kamrangko ka•piljagenchimode mikkangchi GHADC-ko chalaianio neng•nikanirangko chagrongna nangbatgnok ine Marak, kobor ra•timgiparangna parakataha.
Marak-ni u•iatani gitade, ia sal somoirango kajinarangko chimongna man•gijanian GHADC-o dal•batsranggipa neng•nikani ong•enga aro batanggimin jagnian kajinarangko gilna mongsonggipa somoirang ong•genchimoba GHADC-o kam ka•gija chipe donahani a•sel tangka paisarangko chimongrikna man•jahachim.
GHADC-o kam ka•enggiparangna dormaharangko on•na nangengoba tangka paisarang dongjani a•selan neng•nikanirangko chagrongna nangenga ineba GHADC-ni Secretary parakataha.
“Jagittamni kajinarangko chimongesa kam ka•giparangna jasani dormahakon on•na man•enga aro iani a•selan kam ka•giparangna grorang batroroangaha. Kajinarangko chimonganio chinga gong kror 2-mangkosan japrako man•enga indiba kam ka•giparangna gitcham dormahako on•anion japrako gong kror 4-mang ong•skaenga,” ine GHADC-ni Secretary parakataha.
Skangode GHADC-o kam ka•giparangna, sorkari aro gipin private dolrangoniko professional tax gile man•gipaonikosa jasani dormahako on•na man•achim indiba ia changode professional tax-onikoba maming man•gnirang dongsrangjaha ineba Marak parakataha.
GHADC-ko tangka paisani gita bilakatpiltaina kamrangko a•bachengatengaha aro kamrangko matchotahaode council-o tangka paisani gita bilakgnok ineba Marak parakataha.
“GHADC-ni pilak department-rangkon digital aro computerised ong•atahaode kamrangko aro koros ong•anirangko altuaen see rakkina man•gnok aro Garo Hills-ni chel•a biaprango donggipa manderangba, an•tangtangni gamchatgipa tangka paisa aro somoirangko bon•ate Tura-ona re•bana nanggija an•tangtangni council tax-rangko gamna man•na gita chinga bank-rang baksaba link-ko tariengaha,” ine GHADC-ni Secretary parakataha.
