Tura, Jan 31: Garo Hills Autonomous District Council (GHADC)-ko nambate chalaiangna aro district council-o kam ka•enggiparangko nambate nirok sandiangna gita GHADC-ni gital Chief Executive Membor (CEM) Rakesh A Sangma ku•rachakaniko on•angaha.

GHADC-ni gital CEM-na seokako man•ani ja•man Hub News baksa agangrikengon, ua da•o district council-ko dilgipa ong•e district council-ko namao chalaiani aro district council-o kam ka•giparangni namgnina kam ka•anian uni mongsonggipa daito ong•gnok ine Sangma parakataha.

CEM ong•e biaptangko ra•angani ja•man ua Sombar salon, council-ni officer-rang baksa tom•e, dingtang dingtang program-rangko ra•gatani bidingo chanchirimangaha.

“GHADC-o kam ka•enggiparangna bangki jabrini dormahako anga February jani gisepon on•na ku•rachakenga maina ia jara skulo poraienggipa bi•sarangna admission-rangko ra•ani jaba ong•engaha,” ine Sangma aganaha.