Shillong, Sept 26: Hindu toromko manigiparangni a·song gimikchi manitokenga baksana Shillong songjinmaoba gimik sal 9-na ong·atgipa Navratri-ko Ghatasthapana baksa manina gita a·bachengataha.
Navratri-ni somoio Hindu toromo gamchatgipa manirongbewal, Ghathasthapana-ko uamang mongsongbate sal 9 -na manina a·bachengataniko gisik ra·na gita dakronga. Manianio dakrongbewal, Ghatasthapana Abhijit Muhurat-ko pring 11:45 bajioni saljatchi 12:36 bajiona ong·atgen. Navratri 2022 Pratipada Tithi-ko September 26-ni pringwal 03:23 bajioni a·bachengate September 27-ni pringwal 03:08 bajio matchotatgen.
Indake ong·engon, ia bilsini Durga Puja manianiko October 2 tarikoni October 5 tarikona manianggen. A·jao songdonggipa Hindu toromko manigiparang, Khasi Hills a·jani dam 126 gittim ba biaprango puja-ko manianggen, indake Jaintia Hills-o dam 11 gittimrango aro Garo Hills a·jao dam 120 gittimrango maniangskagen.
