Shillong, Jan 18: Re•baenggipa January-ni 21 tariko Meghalaya a•dokni bilsi 50 gapaniko manianio Hill State Movement ba a•dokni jakgitelanina krengdilanggipa manderangna mande ra•pilskaani chin gita dingtangmancha upatti baksana pension-rangko on•china Hill State People’s Democratic Party (HSPDP), a•dokni Conrad K Sangma-ko didiangaha.
HSPDP-ni dilgipa KP Pangniang-ni parakatani gitade, Meghalaya a•dokko man•e on•na krengdilanggipa manderang, an•tangtangni gamchatbegipa somoi, gam-jin aro bilrangko on•kangpile kamrangko ka•ahani gimin ia gisik ra•na krabegipa maniani salo, ia dilgiparangna mande ra•pilskaani chin gita upatti aro pension-rangko on•skana nangenga.
Meghalaya a•dokni bilsi 50 gapaniko manianio HSPDP-ni gitcham dilgipa Hopingstone Lyngdoh sagina, uni mingnamgipa kamrangna mande ra•pilskaaniko dakchina gitaba HSPDP, a•dok sorkariko didiangaha.
Hopingstone Lyngdoh sagiko mande ra•pilskaani chin gita West Khasi Hills ba South West Khasi Hills a•jao sorkari college ba university damsako uni bimingchi mingchina gitaba HSPDP didiangaha.
