Shillong, Dec 30: Hynniewtrep National Liberation Council (HNLC) bobil dolni Junel Tongper minggipa mande saksa Bristibar salo, East Jaintia Hills a•jani Umkiang Border Outpost-o BSF Meghalaya Frontier-ni Inspector General Inderjit Singh Rana-ni mikkango an•tangko bame on•eaha.
An•tangko bame on•egipa Junel Tongper, Umkiang jolo donggipa Lumphyllut songoni ong•achim aro ua East Jaintia Hills a•jao HNLC bobil dolni area commander ong•engachim. Ua 2010 bilsio HNLC bobil dolo napchengaha aro training-ko ra•ani ja•man ua bobil dolna kamko ka•engachim. Uko 2015 bilsio Meghalaya Police rim•ahachim indiba uko jamino watpilani ja•man ua gimachipahachim. Ua 2020 bilsini November jao HNLC bobil dolo nappiltaiaha aro uni ja•man ua Bangladesh a•songni Moulvibazar a•jani ning•o donggipa Panaipunjee songo donge HNLC bobil dolna kamko ka•engachim.
An•tangko bame on•eani ja•man Tongper-ni BSF dolna parakeani gitade, HNLC bobil dolni dilgiparang, lekka pora donggija kamgri ong•e dongenggipa chadamberangkosa bobil dolo rimnapengachim aro uandaken uaba uamangni dilsretaniko man•e bobil dolo napangahachim.
Uni ramramgipa gun aro cholgri ong•ani cholko ra•e HNLC bobil dolni manderang uko bobil dolo rimnapaha aro ong•gija kamrangna jakkalaha ineba ua BSF official-rangna parake on•aha.
Indake ong•engon, re•anggipa bilsionin BSF official-rang, Tongper baksa agangrikna a•bachengaha aro uandaken uko tom•tomaona rimbapilna man•aha ine BSF-ni IG parakataha.
Dilsretako man•e bobil dolo napanggipa bang•bata chadamberangan mikkang salrango bobil doloni ong•kate tom•tomaona re•bapiltokna siengaha ineba BSF-ni IG Rana parakataha.
Tongper-ko tom•tomaona rimbapilna man•ahani gimin uni nokdangni manderangba BSF dolko mittelpilangaha.
