Shillong, Sept 24: Sukrobar saloba, ‘Sur ki Nong Mawlai’ ba ‘Mawlai-o songdongenggiparangni ku•rang’ dolni dilgiparang, tanggitik Shillong songjinmani Secretariat gate mikkango jingjengataniko dakangtaiaha.
HNLC bobil dolni gitcham general secretary Cheristerfield Thangkhiew-ko so•otanio jak donggipa police officer-rangko ta•raken kam ra•galchina dabie Sukrobar saloba tanggitik jingjengataniko dakangtaiaha.
Ia jingjengataniko, KSU, HNYF aro FKJGP dolni dilgiparang dakdilangaha aro jingjengatanio uamang, MDA sorkariko jegale, HNLC-ni gitcham dilgipana kakket bichalko on•china chrik a•boke dabiangtokaha.
Re•anggipa antiosan ia ‘Sur ki Nong Mawlai’ dolni gisepo adita bak ong•aniko nikna man•ahachim.
Indake ong•engon, mikkangchiba uamang bilakbate jingjengatanirangko dakangkugen aro jingjengatanio Mawlai jolko dilenggiparang aro dingtang dingtang dolrangkoba bakrimchina uamang didiangkugen ine FKJGP Mawlai circle-ni dilgipa Khrawkupar Nongsiej parakataha.
