Shillong, Aug 5: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so•otgipani bidingo inquiry dakani report-ko jinmana parakchina dabie Sukrobar salo, Mawlai jolo songdongenggipa manderang aro dingtang dingtang dolrang, Secretariat mikkango jingjengatanirangko dakangaha.

Ia jingjengatanio, so•ota man•gipa mandeni nokdangna kakket bichalko on•china dabie aro MDA sorkarini kosako matnanganirangko dake jinma chrik a•bokanirangkoba dakangtokaha.

Ia jingjengatenggipa manderangoni sakgnikosan sorkariko grongna on•aiahani gimin ja•mano, dingtang dingtang dolni dilgiparang, ia jingjengataniko dakangkuna tik ka•angaha.

Ia jingjengataniko Ka Sur U Bri Hynniewtrep ba ‘Hynniewtrep-ni Ku•rang’ minggipa dolni ning•o dakdilangaha.