Shillong, Feb 4: NPP dol baksa nangrimgimin Meghalaya Democratic Alliance-chi rikenggipa sorkarini rakbee kam ka⋅e ru⋅uta somoirangoni bangki kamrangko matchotatenganina Hynniewtrep Achik National Movement-ni Padot Pa Lamphang Kharbani de⋅mitele aganangaha.
Kobor ra⋅timgiparangna Pa Lamphang-ni aganani gita, MDA sorkarisa ru⋅uta somoirangoni galchipe donenggipa chu⋅sokatna nanganirang jedake Khasi aro Garo Ku⋅sikko Eight Schedule-o napatna dabiani, Inner Line Permit-ni bidingo agan-chanchigrikani aro galchipe donenggipa Crowborough hotel-ni bidingoba cho⋅biltaiaha ine demitele aganaha. Unbaksa Sweeper Colony-ni bidingo jako ra⋅anina aro Legislative Assembly Buildingko rikanio taraken kam ka⋅enganinaba kusini kattarangko aganjolaha.
Chinga Organisation-rang darang political dol baksaba nangrimani dongja aro darang dolni sorkari rikaniko bingbang matnangani demitelani dongja indiba ia chango sorkari rikenggiparangni nama kamrangkosan janape chakpaani kattarangko on⋅aienga ineba Pa Lamphang taldapataha.
A⋅dokona rel ramako ra⋅baani bidingo sing⋅on, iana sorkari dingtangmancha niamrangko name tarina man⋅jaskal rel ramako ra⋅baanikode jegalaigen. Maina da⋅odipet niamgri a⋅dokona napdrabaaniko champengna dingtangmancha tarigimin niamrang dongkujaenga. An⋅chingni a⋅dokko damgipin Tripura ong⋅atna sikchongmotja ine Hynniewtrep Achik National Movement -ni Padot rakbee rel rama-ko Meghalaya a⋅dokona ra⋅baanikode jegale aganangkuaha.
