Shillong, Feb 19: Sokbaenggipa Garo Hills Autonomous District Council (GHADC)ni eleksino gimik ge 29 seat-rangkon chegopna ka·dongsoenganiko parakengon, a·doko da·o sasonni bilko jakkepdilenggipa National People’s Party (NPP), ua eleksino susaange chena gitan uamang chu·gimik tarisoenga ine mijalo parakangaha.
Janapna gita, Garo Hills Autonomous District Council (GHADC)na pu·onataniko re·baenggipa April jani 9 tarik ong·atna manchisoaha, indake on·gimin vote-rangko April 14 tariko chananggen.
Iani bidingo mijal Bristibar salo kobor setimgipararangna agananganio, donga gimik dam 29 seat-rangon susaange chegopna gita chinga tarienga ine a·dokni NPP dolni padot aro Rajya Sabha-ni MP, Dr WR Kharlukhi parakataha.
Adita salna skang warachakgipa dol Congress-ni susaatnasienggipa candidate-rangko bon·e parakangani bidingo sing·on, ia eleksinara meter 100-ko katsusaani ong·ja, indiba meter 15,000-ko katsusaanisa ong·enga aro ia Marathon-o susaangnan NPP dol uana tarie dongsoenga ineba Dr Kharlukhi, kobor ra·timgiparangna aganchakaha.
Somoi ong·jokon uamangni susaatna am·enggipa candidate-rangni bimingrangko parakangan baksana eleksinni ja·man dolni chu·sokatna ku·chakanirangkoba parakangjolgen ine aganenba, warachakgipa dol jeko aganna sika aganaichina, indiba ian Garo Hills a·jani manderangsa uamangni namnikatangko basee pu·onangtokgen, uni gimin result-rangko parakataona sengon iani giminde ma·siaigen ineba Dr. Kharlukhi agandapaha.
