Port Louis, Mar 12: India aro Mauritius a•songni gisepo meli-nangrimaniko mangrakbatatna aro dingtang dingtang kamrango ku•cholsan bakrime ka•angna gita Budbar salo, India a•songni Prime Minister Narendra Modi aro Mauritius a•songni Prime Minister Navinchandra Ramgoolam, mingchet Memorandum of Understanding (MoU)-rango soi ka•grikangaha.
A•song damgnini PM-rang, press meet-ko ong•atanio kobor ra•timgiparangna aganprakengon, Mauritius a•songni National Day-ko maniani salo PM Modi, Mauritius a•songni manderangna an•tangni namgipa skanirangko on•angenba, a•song damgnini gisepo ja•dil su•gimin nangrimaniko janapangaha.
India aro Mauritius a•songara Indian Ocean-chisan nangrimatako man•gipa a•songrang ong•ja indiba jatni daka rikani aro miksonganirango apsan ong•e neng•nikani salrangoba dakchakgrikgiparang ong•a ineba PM Modi aganaha.
Batanggimin bilsi 10-ni gisepo namroro silroroanirangko ra•bana man•gipa kamrangni gimin janapatengon, ia bilsirango a•song damgnini bakrimanirang bilakbataha ine PM Modi aganaha.
Mauritius a•songo gital Parliament-ko rikna gita India a•song dakchakanirangko on•gen ineba PM Modi parakataha.
Re•baenggipa bilsi bongani gisepo Mauritius a•songni sak 500 civil service official-rangna India a•songo training-ko on•gen ine janapatengon, Indian Ocean-ko naljokgipa ong•atna a•song damgnini gisepo songgigrikaha ine PM Modi aganaha.
Mauritius a•songni National Day-o dongpana man•ahani gimin PM Modi-na rimchaksoani kattarangko aganangskaengon, ian a•song damgnini gisepo dingtangmanchagipa nangrimaniko mesokani ong•a ine Mauritius a•songni Prime Minister Navinchandra Ramgoolam parakataha.
India aro Mauritius a•songrang 1948 bilsiosa bakrime kamrangko ka•na a•bachengahaoba ru•uta bilsirangna skangonin ia a•song damgnini manderang, itihas aro daka rikanio bakrimgiparang ong•a ineba PM Ramgoolam aganaha.
Mauritius a•songni namroro silroroanio India a•songni dakchakanirangko man•engkua ine mittelpilaniko janapangengon, ia salni bako mingchet MoU-rango soi ka•grikaniara a•song damgnini bakrimaniko mangrakbatatani ong•enga ine PM Ramgoolam aganaha.
Na·simang ia video-koba nina man·gen:
Na·simang iakoba poraina man·gen: Tura Medical College-ko ta•raken kulina krengenga: Health Minister
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
