New Delhi, July 25: India a•songni sak 15-gipa President Droupadi Murmu, Sombar pring 10:15 bajimango, India a•songni Chief Justice NV Ramana mikkango ku•mikchetaha.
Uni ku•mikchetani ja•man, a•songni gital President-na dingtangmancha pong 21 silchidarerangko goe mande ra•pilskaaniko dakangaha aro uni ja•man ua joljol, skanggipa changna a•songni manderangna aganprakataha.
Uni ku•mikchetaniko dakna skang, kamtangko watangenggipa President Ram Nath Kovind aro gital President-na seokako man•gipa Droupadi Murmu, Parliament-ona apsan re•jombaaha.
A•songni President ong•e skanggipa changna a•songni manderangna aganprakatengon, a•songni President-na uni seokako man•aniara ua an•tang saksanni chu•sokani ong•ja indiba ian a•songo donggipa kangal cholgri mande sakantian jumangmangmangkosan nikaigija an•tangni skaniko chu•sokatna man•a ine mesokanisa ong•a ine parakangaha.
Ua saksa chonbegipa a•bri songo atchigipa ong•e, primary skulo napaniba una jumang gitasan ong•aiachim ine janapatengon, college-o poraina gita biming segatchenggiparangoni uni songo uan skanggipa ong•aha ine India a•songni skanggipa Tribal me•chik President parakataha.
Da•o ua President-ni kamona sokna man•ahani gimin ian India a•songni Democracy-ko mande ra•pilskaani gita ong•enga aro ua namroro silrorobaenggipa a•songko dilangna gita namen rasong chabea ineba Murmu aganaha.
Uni jinmana aganprakani ja•man joljol ua Rashtrapati Bhawan-ona re•angaha, jeon una aro kamtangko watangenggipa gitcham President-naba bon•kame mande ra•pilskaaniko dakangaha.
