New Delhi, Dec 28: India a•songni skanggipa ‘driverless train’ ba saltimgipa gri chalaigipa rel gariko Delhi Metro-ni Magenta Line-na Sombar salo, a•songni Prime Minister Narendra Modi, video conferencing-ko dakanichi Airport Express Line-o a•bachengate on•angaha aro apsan somoion National Common Mobility Card (NCMC)-koba a•bachengate on•angjolaha.
Ia internet gita online program-ko ong•atanio a•songni Prime Minister Narendra Modi baksana Delhi-ni Chief Minister Arvind Kejriwal-ba bakko ra•angaha.
A•songni skanggipa ‘driverless train’-ko a•bachengate on•ani somoio a•songni Prime Minister jinmana aganprakatengon, ia saltimgipa gri chalaigipa rel gariko a•bachengatanian a•songni ta•rake dal•rorobaenganiko mesokani ong•enga ine parakataha.
“Atal Ji-ni rakbee kamrangko ka•anichi Delhi-o skanggipa metro-ko a•bachengatna man•aha. 2014 bilsio chingni sorkariko rikchengani somoio songjinma dambongaosan metro service-rang dongengpitichim indiba da•alo dam 18 songjinmarango metro rail service-rang dongaha. 2025 bilsiode chinga dam 25 songjinmarangna baten metro service-rangko on•gnok,” ine Prime Minister Narendra Modi parakataha.
Ia ‘driverless train’ ba saltimgipa gri chalaigipa rel garirangara chu•gimik an•tangari chalaigipa rel garirangsa ong•ani gimin mandeni dakgualanirang dongjawaha ine sorkari u•iataha. Ia rel gariko Janakpuri West Botanical Garden-oni chalaigen.
