Mankachar, August 25: India-Bangladesh sima-ario South Salmara a•jani Mankachar biapo pante saksa BSF-rangni jakchi goa man•aha. A•sel ong•ani kosako BSF doloni talatanirangko man•kujagenchimoba Assam police sandirikkitani kamrangko a•bachengataha.
Police doloni u•iatani gitade, India-Bangladesh sima-arioni km 500mang chel•ao donggipa Gudoli songo pante saksako chandal goanichi saknaa man•e dongako nikaha, songni na•tok rim•gipa manderang saknaa man•gipa mandeko Monirujjaman minga jekon Fakir ineba okama ine talataha. Saknaa man•gipa panteko sanna banna gita hospital-ona rimangan somoio ramao janggi galaha.
“Mande goanio na•tok rim•gipa saksa so•ota man•aha indioba da•onakingkingba BSF doloni talataniko man•kuja aro a•selo ga•akgipa mandeni nokdangni manderang BSF dolni kosako matnanganiko dakenga. Chinga sandirikkitanirangko dakani ja•man a•sel ong•ani kakket a•selrangko talatgen. Sianggipa mande na•tok rim•gipamanchama ma sruksruk niamni a•palo samrangko badinggipa talkuja. A•selo ga•akgipa mandeni jakoniko torch light ge•sa aro na•tok rim•ani bostuko man•aha,” ine South Salmara-ni DSP(Border) Saifur Ali parakataha.
Songni manderang a•selo ga•akgipa mandeko walo na•tok rim•gipasachim uko BSF-rang nirokna wenani somoio chanchichipanio goe so•otaha ine talate, BSF doloni gitaba uamangni jak donga donggijanikoba mamung agantalatanirangko dakkuja ine parakataha.
“Chandal goani gam•anirangko knae songni manderang a•sel ong•gipa a•damona chaangoa pante saksani saknaa man•e dongako nikeaha aro uko hospital-ona rimangmiting somoio ramaon janggi galaha. A•selo ga•akgipa pante janggi galna skang BSF-rang goaha ine songni manderangna parakangaha. Sianggipa pante bi•sa kangalbegipa nokdangoni ong•e salni somoio hajira kam ka•ronga aro walo na•tok rim•ronga,”songni manderang, kobor ra•ruragiparangna talataha.
