Guwahati, Jan 5: India aro Bangladesh a•songni sima jolo niam gri napsrukbana jakkalenggipa ‘culvert’ ge•sako Assam a•doko nikani ja•man iani bidingo talbate ma•sie ra•na gita Salgipeng Assam-o donggipa Karimganj a•jani police-rang, am•sandianirangko dakna a•bachengaha.
Koborko on•ani gitade, adita salrangna skangsan, Karimganj-ni mande saksako ia biap gitan Bangladesh a•songona rim•gittangangahani gimin ia rama gitan Bangladesh a•songni manderang, India a•songona napsrukbana jotton ka•engnaba gnang ine police-rang, am•sandianirangko dakna a•bachengaha.
Karimganj-oni Dilawar Hussain-ko Bangladesh a•songoni rim•gittanggipa manderang rim•gittangangani ja•man, Assam police-rang, ia biaprangoniko am•sandiengmiting somoio, Bangladesh-oni rim•gittanggipa manderangni India-ona re•bagipa ia ramako nikaha.
Ia culvert-ni ka•mao metre 20 ong•e bakrogipa hume pipe gita Bangladesh-oni mande rim•gittanggiparang, India a•songona re•ruraengachim ine police-rang u•iataha.
A•songni damgnini gisepo mal bostu palsrukenggipa manderang ia apsan rama gitan re•ruraengama ukoba da•o police-rang am•sandina gita a•bachengataha.
Re•anggipa antiosan Dilawar Hussain minggipa mandeko rim•gittangani bidingo uni nokdangni badi ka•aniko Karimganj-o donggipa Nilam Bazar police station-o man•soahachim.
“Missing report-ko man•soani ja•mano chinga Alimuddin minggipa mandeko potchipe rim•aha aro ja•mano rim•gittanga man•gipa Dilawar Hussain-ko man•pilaha. Ia mandeko rim•gittangani bidingo am•sandiengmiting somoio chinga rim•gittanga man•gipa aro matnanga man•gipa mande sakgnikon Indo-Bangla simani sambao donggipa Pramod Nagar tea estate sambaona rimange, uamang maikai a•song damgnini gisepo re•ruraaha uko sing•sandion, ja•mano fencing ka•gipa jolo culvert damsako nikaha. Ia rama gitan manderang altubee Bangladesh a•songona re•rurana man•enga ineba chinga ma•sina man•aha aro ua somoio chinga BSF sipairangkoba ua biapo nikjaha,” ine Sombar salo, Karimganj-ni Additional SP Jyoti Ranjan Nath parakataha.
Police-rangni u•iatani gitade, Dilawar-ko rim•gittangani ja•man uko rim•gittanganggipa manderang, uni nokdangoniko gong lak 5 tangkarangko dabiatenba Alim Uddin-ni jako on•atchina gita aganatahachim. Dilawar-ko Bangladesh a•songona rim•angani ja•man ia tangkarangko ra•na re•bapilengmiting somoiosa Alim uddin-ko police-rang rim•na man•aha aro ia mandeko rim•ani ja•mano Dilawar-ko tangka paisa gamgija watpilataha ine Police-rang parakataha.
