26.3 C
Tura
spot_img

Wari Bila, Attong manderangni mingsa dakbewal ong.a

Must read

Tura, Jan 5 : South Garo Hills a.jani Simsang chijolrango songdong a.chaenggenggipa A.chikrangni daka rikanirang adita dingtanggrika.Ia bewalrangko Baghmara-oni Nongalbibra jolrangona songdongenggipa A.chikrang bang.batan Attong Ki.sikko agangiparang ong.toka. Attong Ku.sik, A.chikrangni aganrongbewal aro sea jotaoni namen dingtanggrika,uan Koch ki.sik baksa apsanangska.

Attong-rang Simsang Chibimani samtangtango songdong a.chagiparang ong.a aro uamang ma.gitcham pagitchamrangni dakbewal rikbewalrangko namen ja.rikbaenga aro ripingenga.Attong-rang Simsang Chibima rikkam jolrango aro diltugipa songrango songdonggiparang ong.a. Uamangni janggi tanganio a.bri buringangko a.ba o.e game ge.e cha.giparang aro a.palrangko matchuchi hal game cha.giparang ong.a. Simsang chijolrango songdongenggipa Attong-rang na.tokrangko rim.e cha.na gita dingtangdingtang cholrangko jakkala.Uamang Simsang Chibimani na.tokrangko majal goe, chekpong de.e aro milsi pie rim.ronga. Unbaksana minggipin, na.tokrangko rim.e cha.ani cholara bilsio changsa Wari Bilaniko dakronga.Ia Wari bilani miksongara chi wariko wilwile jonggi data ine agana, jeni miksongara chi wariko wa.achi bera dake wa.arangko ritchok songe kadula aro mande asonge chekpong de.na uano gan.sangrangko gata ba taria.Indake Wari Bilani salo chi nalsaoni nalsaona dal.dalgipa aro ro.begipa majalrangko salkringe chi wari gimikko salgope na.tokrangko rim.ronga,ukon Attong Ku.sikchi ‘Wari Bila’ ine agana.Ian Attong manderangni mingsa culture ba dakbewal ong.a.

Manderang chanchinaba donga maidake chi wariko bila ine indiba ian na.tokrangko rim.e cha.ani mingsa altugipa chol ong.a.Garo Hills-o wari bilako Simsang Chibima sepang jolrangosan dakrongbata, gipin chonchongipa chiringni warirangkode wari bilrongja. Uni gimin wari bilara A.chik jatni mingsa dakbewal ong.chongmota aro ia dakbewalko mikkangchi name ripingangna nanga.Ja.manode ia dakbewalrang gimanaba donga.

Wari Bilaniko sin.karini somoio ba January aro February jarango dakrongbata.Indake bilsio changsa Wari bilaniko dakengon, January 6 tarik Budbar salo Rewak song sepango donggipa Simsang Chibimani Kausi Wariko, wari bilna gita songni manderang tarisoenga ine koborko man.soaha.Bilsianti Wari Bilako nina aro na.tokrangko brena Garo Hills-ni bang.a manderang re.angronga.

spot_img

More articles

spot_img
-->

Latest article