Shillong, Aug 19: Re•anggipa August-ni 13 tariko Hynniewtrep National Liberation Council (HNLC) bobil dolni gitcham dilgipa Cheristerfield Thangkhiew-ko Mawlai Kynton Massar-o police-rangni so•otgipani bidingo judicial inquiry-ko dakna ge•etahani gimin da•o dipet mamingkoba agankujachina gita Bristibar salo, Opposition dolni dilgipa Mukul Sangma, a•dokni Chief Minister Conrad K Sangma-ko didiangaha.
“Ia a•selni bidingo jakgitelgipa inquiry-ko dakchina aganengani gimin da•o dipet Chief Minister, ia a•selni bidingo mamingkoba agankujaode nambatgen,” ine Sangma aganenba, inquiry-ko dakengmiting somoio chief minister maikoba agangenchimode nangchakeanirang dongnaba gnang ine talatangaha.
Ia a•selni bidingo jakgitelgipa inquiry-kosa dakatenga ong•ode Chief Minister, police-rangna chake aganna nangja ineba Mukul aganaha.
Sangma-ni aganani gitade, inquiry-ko dakna gita sorkari, Meghalaya Human Rights Commission (MHRC)-ni jako on•jagenchimoba niamon iandakgipa a•selrangkode MHRC jako ra•e am•sandironga.
“Mandeni bilko rakkianian MHRC-ni kam ong•a. Uni gimin an•ching namnikoba namnikjaoba MHRC-de an•tangni kamko ka•aigen,” ine Opposition dolni dilgipa parakataha.
