Shillong, July 7: Jaintia Hills-ni koela a·kolo gimagiparangko sandiatanio mikkarangchi neng·nikatako man·a

Batanggimin salo East Jaintia Hills a·jani Umpleng jolni koela a·kolo a·sel ong·e gimagipa manderangko sandiatanio namen rakbegipa kam ong·an baksana wachi-karini mikkarang tipchanggija waengani a·sel neng·nikaniko chagrongtaina gita nangaha.

National Disaster Response Force (NDRF) aro State Disaster Response Force (SDRF)oni adita chi napna sapgiparang, da·o mikkarang waanichi feet 200 mangona chi dal·dapgipa gimik feet 500 mang tu·gipa a·kolo nape sandiatna gita neng·nikanirangko chagrongtokaha.

Mikkarang jime waani a·sel chiko sale galanio aro gimagipako sandiatanio namen neng·nikaniko man·enga ine janapatan baksa, ia antisani gisepon feet 200 mangni gita chirang dal·dape navy-rangna chiko napna amsokgijani ong·engaha ine Disaster Management-ni minister-in charge Pa Kyrmen Shylla u·iataha.

Ia kamna da·odipet tangka gong lak 20 oni 25-rangni gita korosrang ong·aha aro a·kolo gimagiparangoni bangki sakgnikoba dontonggija sandiatangkuna gita ka·dongsoenga.

Janapna gita, ia a·selara mija May 30 tariko ong·ahachim, jeon koela a·kolo kam ka·gipa sakbonga manderang a·kol ning·chi dapako man·tokaha. Mese a·kol bita gita koelako bikotgipa a·koloniko da·odipet sakgittam manderangni manggisiko sandie man·aha.