Shillong, Jan 29: Jaintia Hills a•jani Meghalaya-Assam sima ari gita re•gipa Passyih-Garampani ramako taridapna gita da•al Sukrobar salni bako Meghalaya a•dokni Chief Minister Conrad K Sangma, pangchakaniko songe on•angaha.
Ia Passyih-Garampani ramara Jowai-Ratacherra rama (NH-6)-ni 8th Mile-oni a•bachenge Meghalaya aro Assam simani Saphai jolo bon•egipa rama ong•a aro ia chu•gimik ramani bakroani km 46.982 ong•a.
Ia ramako taridapna gita pangchakaniko songe on•angani somoio a•dokni Deputy Chief Minister Prestone Tynsong, a•dokni Transport Minister Sniawbhalang Dhar aro sakgni MLA-rangba dongpae bak ra•angaha.
Ia ramako taridapna gita World Bank-ni dakchakanichi Meghalaya Integrated Transport Project (MITP)-ni ning•o tangka paisarangko chame on•aha.
Ia ramako taridapna gita pangchakaniko songe on•angani somoio a•dokni Chief Minister jinmana aganprakangengon, salgro salaram jolrango aro mongsongbate Meghalaya a•doko namroro silroroaniko ra•bana gita an•tangko on•kange kam ka•engani gimin a•songni Prime Minister Narendra Modi-ko mittelpilangenba, Meghalaya a•dokni pilak biaprangon iandakgipa namroro silroroatani kamrangko sokatna MDA sorkari jako ra•e kamrangko ka•enga ine parakangaha.
Meghalaya a•dokni namroro silroroanina agriculture aro tourism-ni kamrangko tang•doatna nangchongmotenga ineba Chief Minister aganaha.
Holdirangara sam tarigipa karkanarangna namen gamchatgipa ong•ani gimin ia jolrango Lakadong holdirangko ge•ani gamchatani giminba ua jolo songdongenggipa manderangna gisik ra•ataniko on•angtaiaha.
Ia rama taridapani kamko gong 62,49,18,004 korosrangchi ja 42-ni gisepon matchotatchina gita Rocky Dhar JV Dhar Construction Company-na re•anggipa 2020 bilsini November 5 tarikon on•angahachim.
