Shillong, May 12: Nursing-ni founder Florence Nightingale-ni atchiani salko gisik ra•na gita Bristibar salo, Trained Nurses Association of India (TNAI) West Jaintia Hills Unit-ni gita dingtangmancha nurse-rangni salko Mynso Community Hall-o maniangaha.

Ia salko manianio Laskein C&RD Block-ni Block Development Officer Dr B Langbang, mongsonggipa sokgipa ong•e jinmana aganprakangengon, sagipa manderangko sanna banna gita an•tangtangko on•kange kam ka•engani gimin nurse-rangko mittelpilangaha. Ia kamara namen rakbegipa kam ine ma•sigenchimoba ia kamko seoke manderangna dangdike on•engani giminba ua nurse-rangko mittelpilangaha.

Ia tom•anio Dr Norman Tunnel Hospital-ni Superintendent Dr D Nongpluh-ba dongpae jinmana aganprakengon, ia chasongni manderang ta•rakbegipa kolrang baksa janggi tangengoba pangnan Nokgipa Isolko gualna gita nangja ine nurse-rangko, mikkangchiba manderangna bamani gnang aro ka•saani gnang dangdike on•angkuchina didiangaha.