Imphal, March 7: 1891 bilsini Anglo-Manipur dakgrikanio jakgitelna krengdilgipa Subedar Niranjan Singh Chhetri-ni statue ba bimangko da•al Robibar salni bako, Manipur a•dokni Chief Minister N Biren Singh, Imphal saliram a•jani Kanglatongbi-o oprake on•angaha.
Anglo-Manipur dakgrikanio bakko ra•paahani gimin Subedar Niranjan-ko British sipairang, gipin sakbri manderang baksa 1891 bilsini June 8 tariko pasi on•e so•otahachim.
British-rangni sasonni somoio Subedar Niranjan-ba British Army-ni dol 34-gipa Native Infantry-o sipai ong•e kamko ka•ahachim indiba ja•mano ua British sipairangoni ong•kate Manipur singhasonni Army-o napskaahani gimin uko Bir Tikendrajit, Subedar songahachim.
Subedar Niranjan-ni statue-ko oprake on•angani somoio Manipur a•dokni Chief Minister jinmana aganprakengon, Manipur a•doko Gorkharang chonbegipa jatsan ong•aia ine ka•donga gri ong•na gita nangja maina Manipur a•doko chonchongipa jatrangko maming dakeba dal•dalgipa jatrang sinjete rona man•jana gita uni sorkari nirokenga ine ka•dongatani kattarangko aganangaha.
Manipur a•dokni jakgitelanina krenganio Gorkharangba bang•en on•gilaha ine Subedar Niranjan Singh Chhetri-ni golpoan sakkiko mesokenga ineba Biren Singh aganaha.
Manipur a•doko songdongenggipa Gorkharangni mol•molani gita Subedar Niranjan Singh Chhetri-ni damgipin statue-ko bakan gipin biapoba tarigen ineba Manipur a•dokni Chief Minister parakataha.
