Shillong, August 16: Jal Shakti-ni Union Minister Bishweswar Tudu, Jal Jeevan Mission (JJM)-ni kamrangni kosako mamung ku•agananirang dongja ine PHE Minister Renikton Tongkhar mongolbar salo parakataha.

Batanggipa antio ka•gimin kamrangni kosako nipiltaie chanchirimanirangko dakanio, PHE department-ni see rakkigimin report-rangko pakwatjanina Minister Tudu, gisiko duk man•anikosa janapangaha ine PHE Minister Tongkhar parakataha.

“Kam ka•giminrangni kosako namnikgija ba chu•ongnikgijanirangko ua ku•saba agana dongja. Indake ong•bebegenchim ong•ode a•doko name ka•anina, Ministry-ni award on•anikon man•jawachim. Chinga changgnina award-rangko man•aha aro gipin a•dokrang baksa tosusae nigenchimode chingni kam ka•anirang nambatenga,” ineba Minister Tongkhar agandapaha.