New Delhi, June 29: Re·anggipa Robibar pringo Jammu airport-ni IAF station-o changgni dake drone-chi goprete chadrapani ja·man a·songni Prime Minister Narendra Modi, a·songo chel·chakanirangko baridapatna gita Union Home Minister Amit Shah aro Union Defence Minister Rajnath Singh baksa agangrikangaha.
Union Defence Minister Rajnath Singh, salgittamna Ladakh-ona re·angahachim aro uni Ladakh-ona re·angani somoio Jammu Airport-ni IAF station-o drone-chi goprete chadrapaniko nikna man·ahachim. Ia boma gopretanio Indian Air Force (IAF)-ni sipai sakgni saknaanirangko man·na nangaha ineba kobor on·timgiparang u·iataha.
Kobor on·timgiparangni u·iatani gitade, skanggipa boma Robibar pringwalni 1:37 bajio gopretaha aro gnigipa boma pring 1:42 bajio gopretskaaha.
Ia a·selni bidingo am·sandina gita sorkari, National Investigation Agency (NIA)-na pakwate on·angaha aro iani bidingo sing·sandina gita mande sakgniko rim·aha.
Dingtang dingtang dolrangni aro Jammu & Kashmir police-ni chanchichipengani gitade, ia bomarangko gopretanio Pakistan a·songo bobil dake chakatgipa Laskar-e-Taiba (LeT) jak dongna nangenga.
Ia biapko boma goe chadrapani ja·man Mongolbar salo a·songni Prime Minister Narendra Modi, defence minister Rajnath Singh, Union home minister Amit Shah aro nationa security advisor Ajit Doval baksa tom·aniko ong·atangenba, a·songo chel·chakaniko bilakbatatna aro sipai dolrangko bilakbatatna gita chanchirimangaha ine kobor on·timgiparang u·iataha.
