Shillong, Dec 22: Meghalaya a·doko Khasi jatni ganding chindingni gimin AITC-ni dilgipa aro India a·songni gitcham Cricketer Kirti Azad-ni social media-o kragija dakgipa kattarangko janapatanina Meghalaya a·dokni Chief Minister Conrad K Sangma, suk ong·gijaniko parakatenba, uni iandakgipa kattarangna kemako bi·china dabiangaha.
Adita salrangna skang, a·songni Prime Minister Narendra Modi-ni Khasi jatni ganding chindingko gane ka·gipa noksako social media-o mesokatenba, uni gangipa chola ba·rarangni gimin Kirti Azad ‘chonnika’ gnang kattarangko seatahachim.
Uni iandake jatni gandingko chonnikahani gimin aro Prime Minister-ni kosako kragija kattarangko seatahani gimin Assam-ni Chief Minister Himanta Biswa Sarma-ba social media-o sechatakate, Kirti Azad-ni seatgipa kattarangko raken jegalatahachim.
Indake ong·engon, Meghalaya a·doko Khasi jatni gangipa ganding chindingko aro India a·songni Prime Minister-ko iandakgipa kattarangchi agananiara namen ra·chakna man·gijani ong·aha ine Meghalaya a·dokni Chief Minister Conrad K Sangma-ba suk ong·gijaniko parakataha aro iani bidingo kemako bi·china gita Trinamool Congress-ni dilgipao dabiangaha.
