Tura, May 5: Garo Autonomous District Council (GHADC)-ni dakchakgipa jakrikra, jingjengataniko dontonge kamtangtangko ka·pilchina Non-Gazetted Employees Association (NGEA)-ni dilgiparangko mol·molataha.
GHADC-ni dakchakgipa jakrikra ba Joint Secretary-ni seachi mol·molatanio, GHADC-ni kosako jingjengataniko dontonge kamtangtangko ka·etokpilchina gita didiangaha.
“Anga, GHADC-ni gital seokako man·gipa ba ra·chakgimin Executive Committee (EC)-ni bilko man·e iachi NGEA-ko didiatenga” ine GHADC-ni dakchakgipa jakrikra, NGEA-ni dilgiparangko mol·molataha.
Beben GHADC-o kam ka·enggiparang an·tangtangni man·na nangenggipa betonrangko district council-ni on·na man·jaengani gimin, man·kugijagipa betonrangko on·china dabianide kakketan ong·a. Indiba NGEA, GHADC-ni niamko pe·e kamtangtangko ka·gija jingjengataniara niamni kosako ong·a, uni gimin kam ka·gija jingjengataniara GHADC-na aro songdongenggipa sakanti manderangna dal·bea gimaani ong·a ineba janapatjolaha.
Unbaksana, Mongolbar salo GHADC-ni dakchakgipa CEM, Te Nikman Ch. Marak-ni dilanichi, High Level Committee (HLC), jeon sasono ong·enggipa aro warachakgipa dolni MDC-rang baksa chanchirimanganio chu·sokgipa ong·jaha.
Indake ong·genchimoba, manderangni namgnina, GHADC office-o kamrangko ka·angna gita Executive Committee chanchirimaniko dakangaha, ine dakchakgipa CEM koborna parakataha.
