Tura, Feb 10: Songsongantioni pilak nokdangrangna chi pipe-rangko sale on·achi manderangna rongtalgipa ringani chirangko on·na miksonge ma·mong sorkarini a·bachengatgipa Jal Jeevan Mission (JJM) programme-ni kamrangko contractor-rangni name aro tik ong·e ka·jaenganiko nikenba Sukrobar salo, South Garo Hills, Baghmara-ni Niksamso Garo Community Organization (NGCO), Southern Zone-ni dilgiparang suk ong·gijaniko parakataha.
Iani bidingo koborna seachi u·iatgipao NGCO, Southern Zone-ni padot Arjun S Marak-ni janapatani gitade, a·jani ning·o donggipa bang·a songadam biaprango Jal Jeevan Mission programme-ni ning·o kamrangko ka·atenggipani gimin organisation-ni manderang Sibbari Matchadu Halweram songchina re·ange nirokeani dakon kamko matchotatna tikka ra·gipa contractor-rangni kam tik ong·gija ka·anirangko nikbana gita man·aha ine parakataha.
Ia programme-ko chu·sokatna gita ma·mong sorkarini chu·onga gita tangka-paisarangko a·dokna chamatengoba, kamko jakma mine ka·jaengani gimin an·tangtangni suk ong·gijaniko parakatenba, ia mamlako nirokatchina Baghmara PHE-ni SDO ba iano bak donggipa official-rangko mol·molatan baksa, kamko jako ra·e ka·atenggipa contractor-rangkoba tik ong·e ka·china gita Baghmara-ni NGCO-ni dilgiparang koborna seachi u·iatgipao mol·molatjolaha.
