Shillong, Sep 18: Jowai-o donggipa Ches’ Stars Higher Secondary School-ni Auditorium-ko Sonibar salo, Jowai-ni MLA Wailadmiki Shylla, nokdonggae on·angaha aro ia auditorium-ko nokdonggae on·anganio West Jaintia Hills a·jani Deputy Commissioner BS Sohliya, West Jaintia Hills a·jani DSEO AP Syiem aro gipinrangba dongpae bak ra·angaha.
Ia auditorium-ko Ches’ Stars Higher Secondary School-ko kulidile on·anggipa manderang, chong·motan J Jones Syngkon sagi aro Sibyl Rease Chullai sagini bimingchi mingrikaha.
Ia auditorium-ko nokdonggae on·angani somoio Jowai-ni MLA, jinmana aganprakangengon, songsalna a·gilsakni seng·aniko nangchongmota aro chatro chatrirangna namgipa lekka poraniko on·na gita skul ge·antion, Smart Classroom-rangko, auditorium-rangko aro kal·chakram biaprangkoba nangchongmotengaha ine parakangaha.
