Guwahati, Sept 18: Muslim toromni gimin skiprakani kamrangko ka·na, a·songgipinchi songrena gita on·gipa tourist visa-rangko jakkalsretanina sak 17 Bangladesh a·songni manderangko Assam-ni Biswanath district-oniko rim·ani salsa ja·man, batanggimin changrango iani gimik mikrakatahaoba songsul a·songchini re·bagipa Muslim toromni mitam dilgiparang tourist visa-ni niamko pe·a baksana badiaba songadam biaprango toromni gita tom·bimonganirangko dakenga ine Assam police mikrakna nangani kattarangko parakataha.
Iandake Bangladesh-ni re·bagipa Muslim manderangni tourist visa-ni niamrangko pe·ani mamlao batanggimin somoio Assam sorkari, ma·mongnaba seachi u·iatangahachim.
“Bangladesh-ni mitam Mulla-rang, moulavi-rang ba ugita dakgipa toromni dilgiparang mongsongbate lower Assam aro Barak Valley jolona re·bae dongenggiparang ba mitamrang okamatako man·e re·bagiparang batroroenga. Uamang gimikan tourist visa-chi songrebagiparang ong·a aro toromni bimingo agan-ku·pattianirangko aro didianirangko on·achi manderangko dilsretna jotton ka·aniko nikna man·a jean nama ong·ja. Uni gimin ia mamlao Assam police namen rakbate ja·kurangko de·atgen ine uamangna u·iataha. Indake ong·engon, salsa skang Biswanath district-oniko Bangladesh a·songchini tourist visa-rango re·bagipa manderangni gimin koborko man·sringe adita sing·rikkiatanirangko dakataha jechin uamang maming kam nanganaba ong·ja indiba toromni gita skipraknasa re·batokaha ine ma·sina man·aha. Anga uamangko toromni gita ong·gijako skiprakenga ine aganjaenga indiba tourist visa-ko jakkalesa uamang skiprakanirangko dakatenga, uni gimin gipin a·songchini manderang ong·oba chinga uamangko rasong gribee rim·na ga·akaha maina uamang visa-ni niamko pe·aha” ine Assam DGP Bhaskar Jyoti Mahanta parakataha.
Mija anti Sonibar salo Biswanath district-ni Gingia a·jani ning·ogipa songadam Baghmari joloniko songsul a·song Bangladesh-ni sak 17 manderangko rim·aha ine u·iatanganio, Assam a·dokona re·bana skang uamang Rajasthan-ni Ajmer Sharif-china re·anga baksa Bengal-ni Cooch Behar district-chiba re·angaha aro visa-ni niamko pe·anio dakchakgipa a·songoni sakgni manderangkoba rim·dapaha ine police, koborna u·iatdapaha.
