Ampati, Jul 10: South West Garo Hills a·ja ning·o ga·akgipa Kambakpara songni Government Lower Primary School-ni gitalgipa building-ko, 45-(ST) Mahendraganj Constituency-ni MLA aro Meghalaya Excise-ni Advisor ong·enggipa Sanjay A. Sangma-ni jakchi, Sukrobar salo nokdonggae on·aha. Ia tom·anio dingtang dingtang sorkari Department-ni official-rang, chatro chatrirang aro songdongkamgipa manderang dongpae bak ra·angaha.
Ia School nokko ru·uta bilsirangna galchipe dongimin ong·genchimoba, da·alo gitalgipa building-ko man·aniara chatro chatrirangnasan ong·aigija ua songni manderangna aro sepang jolo donggipa songnaba nambata lekka porako skie ra·anio dakchakani ong·gnok.
Songko re·dilenggipa Rev. I.A. Sangma ia LP School-ko a·bachengatani gimin jinmana aganengon, ia LP school-ko 1957 bilsio a·bachengataha aro ua somoionin ua songni bi·sarangna aro sepang jolo donggipa songni bi·sarangna lekka porako skie ra·na dakchakaha ine aganan baksa, ia gitalgipa school building-ko rikna dakchake songsalna namgniko on·ahanina MLA-koba mitelpilskaangaha.
MLA Sanjay A Sangma-ba tom·anio aganengon, Meghalaya a·dokni kona noksiko donggipa songo lekka porako skie ra·chakenggipa nok rangko taridape on·a gita sorkari bilaken kamko ka·enga aro nambata lekka pora skianiko on·a man·a gita ge 2,000 mangni gita gital school nok aro college building-rangkoba sorkari rikna miksongenga ine aganaha.
Indake, skie ra·chakenggipa nokrangko rikana agreba kal·susaani a·bao chamdamberangni bak ra·aniko tang·doatna gita Mahendraganj Constituency ning·o ka·na miksongenggipa kamrang jekai, Indoor Stadium aro Mini Stadium-koba tarianggen ine ku·rachakaniko on·angaha.
Ampati-ni Sub-Divisional School Education Officer In-charge ong·enggipa Emphul Ch. Marak, ia gitalgipa chasongo gitalgipa school nokrangko rike on·a man·aniara lekka pora-ko mang·mang skie on·a miksongja indiba, mikkangchi ka·donggipa ong·e lekka porako skie ra·gipa chatro chatrirang ong·na gita uamangko didianiba ong·a ine aganaha.
Bon·kame Kambakpara LP schoolni Head Teacher, mitelpilskaani kattarangko aganengon, sorkari, songsalko dilgiparang aro ia project-ko matchotatna kamko ka·gipa songni manderangni on·gilpaaniko on·ahanina mitelpilskaangaha.
Na·simang iakoba nina man·gen:
Na·simang iakoba poraina man·gen: Toll gate-rango skatang kajina ra·anirangni bidingo District Councilrangna mikrakataniko on·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
