Tura, May 27: Bristibar salo, kamtangtangko ka·e noktangtangchi re·angpilenggipa officer-rangko Garo Hills Autonomous District Council (GHADC)-o jingjengatenggipa manderang champengna jotton ka·aha aro ro·ongrangkoba goe gari bolsako nosto ka·aha ine kobor on·aha.
Kobor on·timgiparangni u·iatani gitade, GHADC-o kam ka·enggiparang, an·tangtangni dormaharangko man·jaengani gimin kamrangko ka·gija jingjengattokengon, Bristibar salo kam ka·e office-oni re·bapilenggipa officer-rangko aro GHADC-ni chief executive membor (CEM)-koba ramao champengsona jotton ka·aha aro adita somoirangni ja·manosa ramako wataha.
CEM-ni re·angani ja·mano obostarang namjabatna a·bachengaha maina office-oni re·angpilenggipa officer-rangko Non Gazetted Employees Association (NGEA)-ni bimingo kam ka·enggiparang ramao champengsona jotton ka·aha ine u·iataha.
Ramao champengsoe uamang officer-rangko gariko neng·takatchina aro garioni ong·katchina dabitokaha.
Iandake champengengmiting somoio Accounts branch-ni officer saksa, uamangni champengenggipa ramako salprue kataha aro iandake gariko sale katanio jingjengatenggipa me·chik saksa saknaaniko man·na nangaha ine kobor on·timgiparang parakataha.
Ia officer-ni gariko sale katengmiting somoio jingjengatenggipa manderang uni gariko ro·ongchi gorikaha aro uni gari adita nosto ong·atako man·aha.
Iandake kam ka·e re·pilangenggipa officer-rangko kragija dake ramarango champengahani gimin GHADC-ni CEM-ba suk ong·gijaniko parakataha.
“Uamang an·tangtangni neng·nikanirangko namatchina aro dormaharangko on·china dabiengani giminsa chinga uamangna dormaharangko on·na gita kamrangko ka·enga indiba uamang batesa obostarangko namjabataona ra·baenga. Officer-rangkon kam ka·na on·jaenga ong·ode maikai uamangni neng·nikanirangko namatna man·gen?” ine CEM sing·doangaha.
Indake ong·engon, gariko salprue katanio jingjengatenggipa me·chik saksa saknaanirangko man·na nangahani gimin ia officer-ni kosako jingjengatenggipa manderang, police-rangna badi ka·doangskaaha.
