Shillong, May 25: Khasi Hills Autonomous District Council (KHADC)-ni Enforcement Police baksana East Khasi Local Taxi Welfare Association (EKLTWA) nangrimenba, Bristibar salo, Shillong songjinmao taxi salenggipa gipin jatrangoniko trading aro labour licence-rangko tanggitik ong·e sandiataniko dakangaha.
Iandake gipin jatrangoniko gitik-gitak licence-rangko sandiataniara, re·anggipa anti Bristibar walo, Khyndailad ba Police Bazar-o saksa Khasi taxi salgipako aro uni ripengko baditaba sak gipin jatrangni doke-sate donangani gimin, nanggipa lekkarang chu·onge donggijagipa Shillong songjinmao taxi sale cha·enggipa gipin jatrangoniko license-rangko sandirokchina gita Shillong-ni taxi drivers’ association-ni KHADC-o dabiangani gimin ong·achim.
Indake ong·engon, District Council-ni Enforcement Police, Bristibar salni gisepo Motphran, MUDA parking road, Red Cross Last Stop Laban, Bishnupur, Polo, Madanrting, Happy Valley, Iewmawlong, Khlieh iewduh aro Jhalupara biaprangko man·chape Shillong songjinmani dingtang dingtang biaprangni ramarango donge taxi salenggipa gipin jatrangoniko license-rangko sandirokangaha.
