Shillong, July 17: Khasi-rangoni jakgitelanina dakgrikdilgipa mingsinggipa – U Tirot Sing Syiem-ni chang 190-gipa siani salko Khasi Students’ Union (KSU) Bristibar salo mande ra·bee manianiko dakon, a·dokko aro uni manderangko chelchakna rakgipa niamrangko ra·gatchina a·dok sorkari aro bil gnanggipa manderango dabiaha.
“An·tangtangko aro a·doktangko chelchakna aro nirokna niamrangni gimin jera ra·grike uarangko ra·gatna ine manderang an·tangtangni seokgimin dilgiparangko secretariat/Assembly-ona watatenga indiba ia dilgiparang saksa sakgipinko dos galgrike somoirangko bon·atenga ,” ine U Tirot Sing Syiem-ni tarigimin bimang-ni mikkang-o KSU-ni dilgipa Lambokstarwell Marngar jinmana parakataha.
Batanggimin somoirango a·doko donggipa a·brini jatrangko chelchakna aro nirokna nangani bidingo bang·a obostarangkon KSU janapanirangko dakaha ine Marngar aganaha. 2013 bilsio Inner Line Permit-na (ILP) so·sojengjeng ong·ani somoirango bang·a chadamberangkon police-rang rim·aha aro sorkari-ni name kam ka·gijani a·selo manderang an·tangtangni dabianirangko chu·sokatna sorokrango re·jomanirangko dakna nangaha ine ua gisik ra·atpilaniko dakaha.
Rang·sita dipetna ka·donganiko watgalgija, seokgimin dilgiparangosan pangchakaigija an·tangni aman a·songko chelchakna aro nirokna an·tangtangan kangkare kae ra·china KSU-ni dilgipa chadamberangna didianikoba on·aha.
Uandake, railway project-rangni bidingo kam ka·enggiparang, manderangni namgnina ong·ja indiba an·tangtangni man·gninasa kam ka·enga ine Marngar matnangaha aro iandakgipa ong·gija kamrangko nie dongaigija bil-o ong·gipa manderangko kakket bichalona ra·bana nanga ine ua janapaha.
Ka·donggipa manderang sija maina uamangni kamrang pangnan dongkama ine KSU-ni dilgipa talate, a·brini jatrangko chelchakna aro nirokna ine uamang kam ka·enga ine aganaha aro tol·pinike ka·sachakgipa manderangna mikrake, uamangni gimin u·ie dongchina didiaha.
Shillong-o pekgipa ringanirangko jakkalani aro cha·ugiparangni bang·roroanirangni bidingoba ja·ku de·na nangenga ine, jatni cholon-bewalrang donggenchimoba iandakgipa neng·nikanirang uamangni songsar-ona maina neng·nikanirangko ra·baenga ine Marngar sing·doaniko dakaha.
“An·chingni bobilrang a·paloni ong·ja indiba an·ching baksa dongrimgiparangan ong·a. An·tangtangni namgnina an·tangni biapko pale cha·na am·gipa manderangba an·chingni gisepo gnang. Uni gimin, iandakgipa manderangko sandie uamangko an·chingni giseponiko a·rikatna nanga,” ine Marngar janapaha.
Apsandake, Khasi manderangni an·tangni a·song-chigana aro man·gnirangna dakgrikanirangni gimin North East Student Organizations-ni (NESO) Chairman, Samuel Jyrwa janape, bilsi 54-na a·dok ong·ani aro bilsi 78 India-ni jakgitelani ja·mano uamangni jat chelchakani aro jakgitelaniko man·bebeahama ine ua sing·doaha.
Mikkangchina re·baenggipa chasongrangko chelchakna aro nirokna an·tangtangan ja·kurangko de·china Jyrwa chadamberangna ku·pattie, a·songtang-chigatangni nokgipa ong·na warachakna aro mikkangchi re·baenggipa neng·nikanirangko dakgrikchakna nanga ine ua aganaha.
Khasi manderangni itihas-o jegalanirangko janape, Jyrwa 1979, 1987 aro 1990 bilsirango aro adita somoirangna skang an·tangtangni man·gnirangna sorokrangona re·jomanirangko gisik ra·atplaha aro jatko warachakna iandakgipa jegalanirangko dakangkuna nanga ine aganaha.
Na·simang iakoba nina man·gen:
Na·simang iakoba poraina man·gen: Cha·ogimin scooty-ko SGH-o man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
