Khliehriat, Feb 2: Congress dolni changgnina MLA ong·e da·o National People’s Party (NPP)-o napangskagipa Nehlang Lyngdoh, Bristibar salo, an·tangni nomination-ko East Khasi Hills a·jani Khliehriat-o file ka·angaha.
Changgnina Khliehriat constituency-ni MLA ong·anggipa Nehlang Lyngdoh, 2022 bilsini March jao NPP-o napangahachim.
Lyngdoh-ni nomination file ka·eani somoio uni ripengskarang, NPP-ni dilgiparang aro JHADC-ni chairman Sankey Shangpung-ba dongpaaha.
Changgnina election-o seokako man·ani ja·man ua election-rango susataijana manchiahachim indiba ia changode ua susapiltaina tik ka·skaaha.
2003 aro 2008 bilsio ua Khliehriat (gitcham Rymbai) constituency-oni susae seokako man·ahachim indiba 2013 bilsini Assembly election-ode ua susaskajahachim.
Bilsi 10-ni ja·man da·o Nehlang Lyngdoh, politics-ona re·bapile Assembly election-o susataienga aro ia chango ua da·o Khliehriat-ni MLA ong·enggipa aro United Democratic Party (UDP)-ni cabinet minister Kyrmen Shylla baksa susagrikskana sienga.
