Shillong, June 5: Meghalaya Environment Week-ni bak gita World Environment Day-ko maniani salo, Meghalaya a·dokni Forest & Environment Minister James PK Sangma, Kyrhuhkhla aro Lunar chiringrangko tangatpilani project-na dingtangmancha pangchakaniko, Khliehriat West-ni Umsyllih-o songe on·angaha aro ia apsan salon ua, Khliehriat East-ni Pohskhen-o koela bikotanichi nosto ong·gimin biaprango bolrangko ge·ani project-koba a·bachengate on·angjolaha. 
Kyrhuhkhla aro Lunar chiringrangko tangatpilani project-ko Trinity International, jako ra·e ka·enga aro iana MEPRF-ni gita tangka paisarangko dakchake on·engachim. Ia project-ko ra·gatanichi, Lunar chiring samba jolrango donggipa gimik dam 25 songrang namgnirangko man·gnok.
Ia project-na pangchakaniko songna gita dingtangmancha World Envinronment Day-ko manijole, East Jaintia Hills a·jani Khliehriat West Community Hall-o tom·aniko ong·atangaha aro ia program-ko Forest & Environment Department baksana Mining & Geology department nangrime ong·atangaha.
Ia program-ko ong·atanio a·dokni Forest & Environment Minister James Sangma, jinmana aganprakengon, Lukha chiringko tangatpilna gita Trinity International-ni kam ka·anio chu·sokanirangko nikna man·ahani gimin ia project-koba a·bachengatengaha ine parakangaha. World Environment Day-ni gimin aganangengon, a·gilsako mandeni janggiko tange rakkina gitara balwa aro chiko nangchongmota aro ia salni bako ong·atenggipa program-ara balwa aro chio nangchakegipa program-an ong·ani gimin ian manderangna namen mongsonggipa program ong·enga ine Sangma parakataha.
Ia chiringrangko tangatpilani project-ni gimin talataniko on·angskaengon, ian samtangtango ong·telaigipa cholrangko jakkale namatani ramramgipa project-san ong·aia ine Forest Minister parakataha.
Samtangtango ong·enggipa obostarangko namatna gita sorkari, mikkangchi dingtang dingtang cholrangko ra·gatna sienga ineba ia tom·anio Sangma parakangaha.
Ia program-ko ong·atanio dongpae jinmana aganprakanggipa gipin manderangara, State Expert Appraisal Committee-ni Chairman Nabha Battacharya, Forest & Environment-ni Commissioner & Secretary SMA Razi, Mining & Geology-ni Secretary E Kharmalki, Forest Ministry, Environment & Forest, Climate Change, Regional Office Shillong-ni Deputy Director Imtienla Ao, Meghalaya-ni PCCF & HoFF BK Lyngwa aro gipinrang ong·a.
Ia program-ko ong·atanio, World Environment Day-ko maniani bak gita ong·atanggipa Essay Competition, Drawing & Painting aro Slogan competition-o chegiparangnaba boksisrangko suale on·angjolaga.
