Shillong, Dec 07: Khasi Students’ Union (KSU), Butbar salo, Shillong, Dhankheti-ni Shillong Law College sambao uamangni gitcham dilgipa Bull N Lyngdoh sagini a·gilsakko watangani bilsi 28 gapaniko uni mangkrongko tarigipa mikkango gisik ra·aniko dakangaha.
Bull Lyngdoh sagiara, KSU-ni padot ong·e 1984 oni 1989 bilsiona kingking dangdike on·anggipa saksa ong·achim.
Uni siani bilsiko gisik ra·anio, dingtang dingtang unit-rangoni KSU-ni memborrang baksana Lyngdoh sagini nokdangni manderang gimikan dongpatokaha.
Tom·ao bakko ra·giparangna aganprakatengon, KSU-ni padot Lambokstarwell Marngar, KSU-ni padot ong·e dangdike on·mitingo Lyngdoh sagini jattangko chelchakna gita an·tangni somoirangko aro bilrangko ong·kange dangdike on·anganiko gisik ra·atanga baksana, Lyngdoh sagini namgipa kamrangko aro uni on·kanganirangko pangnan gisik ra·gen ineba Marngar aganprakataha.
