Shillong, Dec 07: West Jaintia Hills a·jao tourism-ni a·bako minggipin dakgipa cholchi tang·doatna miksongenganio, Jaintia Rural Tourism Society (JRTS), West Jaintia Hills, Jowai-oni km 16-mang chel·gipa Amlarem Civil Sub-division-ni ning·ogipa Skhen Pyrsit-ni Loomkyntoor resort-ni an·sengbatgipa biapo re·baenggipa December 10 tariko skanggipa changna Southern Slopes Music Concert 2022-ko ong·atnasienga ine koborna u·iataha.

Iani bidingo JRTS-ni padot Teibor Toi-ni koborna talatani gita, United States-oni dolsa International band, ia ring·salrao mongsongbatgipa ong·e dakmesokanggen ine u·iatan baksa, Shillong aro Jowai-oni joltangni dingtang dingtang band-rang jekai – DewDrops, Rum And Monkeys, Seis Euphony, Imprints and Nexus-rangba December 10 tariko dakmesokanggen, unbaksana, UK-oni sokbaenggipa Reggea DJ Earl Gateshead, bon·chote dakmesokangskagen ineba u·iataha.

Toi-ni aganani gita, koela cho·aniko sorkarini dontongatanichi songsalni gita aro West Jaintia Hills a·jao songdongenggipa manderangni janggi tanganirang namen su·pekako man·engani gimino, tourism-ni a·bachi minggipin dake janggi tangani cholko dake ra·na gita uamang cholrangko sandiskaenga.