Shillong, Oct 16: Mylliem Constituency-ni ning·o donggipa Lawsohtun-o Multipurpose Indoor Stadium-ko rikna gita Sonibar salo, Meghalaya a·dokni Chief Minister Conrad K Sangma, a·dokni C&RD Minister aro joltangni MLA Hamletson Dohling-ni mikkango pangchakaniko songe on·angaha.
Ia indoor stadium-na pangchakaniko songe on·angani somoio a·dokni Chief Minister, jinmana aganprakangengon, ia stadium-ko rike on·china gita jolni manderang ru·uta bilsirangonin dabitokengani gimin ia dabianiko chu·sokatna gita jolni MLA Hamletson Dohling rakbee kamrangko ka·aha aro da·o manderangni jumang be·en pil·na siengahani gimin ian jolni manderangna aro mongsongbate chadamberangna pattiani ong·gnok ine parakangaha.
Ia Multipurpose Indoor Stadium-ko ‘Khelo India’ aro a·dokni scheme-ni ning·o gimik gong crore 8.7 korosrangchi rikna sienga.
Chadamberangko dingtang dingtang kal·susaanirango tarina man·na gita aro chadamberang an·tangtangni kal·susaanio changa sapanirangko mesokna man·na gita ia stadium-ko ta·raken rikna a·bachengatgnok ineba Chief Minister, an·tangni ka·dongchakenganiko parakangaha.
Batanggimin bilsibri atani gisepo ia sorkari, a·dokko namroro silroroaniona ra·dona gita bang·en kamrangko ka·aha ine janapatengon, a·doko kal·susaanirangko namdapatna aro chadamberangni nanganirangnaba ia sorkari gisik on·e kamko ka·aha ine Chief Minister parakataha.
Meghalaya a·doko bilsi 17-na ong·atkugijagipa Meghalaya Games-ko ia sorkari changgnina kingking ong·atna man·aha ine janapatengon, bakan Meghalaya a·doko Northeast Olympics-koba sokachakna siengani gimin a·dokni chadamberang, ia kal·susaanioba an·tangtangni changa sapanirangko mesokna cholko man·gnok ine Sangma parakataha.
National Games, Olympics aro dingtang dingtang Commonwealth Games-rango a·dokni chadamberangba chegiparang ong·e a·dokna medal-rangkoba chebae on·anian uni mongsonggipa miksongani ong·enga ineba Chief Minister aganaha.
