Shillong, Jan 10: Meghalaya a•doko lockdown-ko ra•gatani bidingo da•o dipet sorkari chanchia dongkuja ine Sombar salo, a•dokni Chief Minister Conrad K Sangma parakataha.
Chief Minister-ni parakatani gitade, a•doko songdongenggipa manderangni janggi tanganio neng•nikanirangko ra•bana nangnikjaengani gimin da•o dipet sorkari, lockdown-ko ra•gatna miksonganirang dongkujaenga.
“Obostarang namjabataona sokangna nanggenchimosa chinga lockdown-ko ra•gatani bidingo chanchitaina nangao ga•akgen aro iani giminsa chinga nanga gita chel•chaksoanirangko dakenga aro manderangkoba an•tangtangna simsake dongchina chinga mol•molenga,” ine Sangma aganaha.
Meghalaya a•doko ka•sinsin COVID man•giparang batrorobataienga ine talataniko on•angengon, da•o dipet a•doko Delta aro Omicron man•giparangko batanggimin chango gitade hospital-rango admit ka•a dongkujaenga ine Chief Minister parakataha.
“Da•o dipet a•doko obostarang namsranggijade ong•kujaenga aro hospital-rango chu•onga gitan palangrangba donga. Indiba ia somoio chinga sorkarini gita, hospital-rango admit ka•anikoba name nirikkina nangenga,” ine Sangma aganaha.
An•tangtangko aro an•tangtangni nokdangrangko naljoke rakkina gita tikarangko su•e ra•china aro COVID-19-ko warachakna dongimin niamrangko ja•rikchina gitaba ua a•doko songdongenggipa manderangko didiataha.
Bilsi 60 batgimin manderangna aro mikkango donge sabisiko warachakenggipa manderangna Booster Dose-ko a•bachengataha ine janapatengon, gipinrangnaba ia booster dose-ko ja•mano on•anggen ine Chief Minister parakataha.
Da•o dipet Meghalaya a•doko COVID-na tika su•ani 70 percent-na badeangaha ineba ua parakataha.
