Shillong, Jan 10: A•song gimikon COVID-19-ni Omicron rokom giproroengani gimin Meghalaya a•dokni bilsi 50 gapaniko sorkarini manchisogimin gita ong•gija chonbate maniangskana gita a•dok sorkari tik ka•angaha.
Sombar salo sorkarini tom•e chanchirimangani ja•man kobor ra•timgiparangna talataniko on•angengon, Omicron rokom giproroengani gimin a•dok sorkari, Meghalaya a•dokni bilsi 50 gapaniko a•bachengo tik ka•sogimin gita ong•gija chonbate maniskana tik ka•angaha ine a•dokni Chief Minister Conrad K Sangma parakataha.
Chief Minister-ni parakatani gitade, Meghalaya Day-ni official program-ko a•dokni skotong Shillong songjinmani JN Complex-o January 21 tarik pring 11:00 bajio ong•atanggen aro ia program-o 30 percent-ni gitasan manderang bak ra•pana man•aigen.
Meghalaya a•dokni ning•o donggipa gipin a•jarangba internet gita Shillong-o ong•atenggipa program-o bakko ra•angskagen ineba Chief Minister parakataha.
A•dokni bilsi 50 gapaniko maniaona a•songni Prime Minister Narendra Modi re•bagenma re•bajawa, da•o dipet Prime Minister-ni office-oni maming u•iatanirang dongkujaenga aro koborko man•soani ja•manosa nanga gita program-rangko tarianggen ineba Chief Minister parakataha.
Meghalaya a•dokni bilsi 50 gapaniko manianio a•bachengo manchisogimin gita ming 50 project-rangko a•bachengatjawaha ine u•iatengon, iani pal a•dok sorkari, ming 300 project-rangko segate bilsi gimiko a•bachengate on•angskagen ine Sangma parakataha.
Indake ong•genchimoba, Chief Minister-ni parakatani gitade, ia salko manianio mongsonggipa project-rangoni mingsa ba minggniko jako ra•e jinmana parakatskagen.
