Williamnagar, July 11: College-ni Sports Committee, Red Ribbon Club baksa apsan bakrimenba “A Day of Fitness, Knowledge and Youth Empowerment” ine katta bichongko donenba, Williamnagar-ni Loyola College-o Red Ribbon Youth Festival 2026-ko ong·atangaha.
East Garo Hills Superintendent of Police Pawar Swapnil Vasantrao, tom·anio mongsonggipa sokgipa ong·e aro District Medical and Health Officer Dr. Cruzie Elmina N. Sangma, dal·batgipa sokgipa ong·e bak ra·angskaaha. MACS-ni Assistant Director (Youth) Larina Nongpuir aro gipin official-rangba dongpae bak ra·angpaaha.
Principal Fr. Stephen Athikho, an·seng baljoke dongani aro namgipa bewalrangko ja·rikchina didianiko on·engon, chubata gadango skia pora man·aniara chatro chatrirangko daito-ko ra·e janggi tanggipa aro mandeskana ka·sagipa ong·na dakchakaniko on·a nanga ine aganangaha.
Larina Nongpuir, Hub News baksa agangrikengon, ia Red Ribbon Youth Festival-ara National AIDS Control Organisation (NACO)-ni skie on·achi aro dingtang dingtang kamrango bak man·atpaanichi chadamberangni gisepo mikrakataniko on·a miksonganio a·bachengatgipa ong·a ine aganangaha. Una agreba, Meghalaya a·doko HIV sabisiara jajrengna nangbatgipa ong·baenga ine aganengon, bang·a manderangan an·tango HIV dongama dongja uko u·itokja ineba ua u·iatangaha.
Iani gisepon, Meghalaya a·dok India a·songo HIV man·giparangoni 8-gipa gadango ong·enga ine u·iatengon, ua chadambe manderangko kenchakna nanggipa bewalrangko gelchina aro an·tangtangko HIV porikka ka·e nichina didiatan baksana East Garo Hills-o sak 41 manderang HIV man·giparang ong·a ineba ua u·iatengkuaha. Ian 4-gipa Red Ribbon Festival-ko ong·atani ong·engon, 3-gipaonade Tura-o ong·atangaha, indiba Williamnagar-ode ian skanggipa changna ong·atchengani ong·skaenga ineba ua janapataha.
A·doko bang·bata HIV-ko man·gipa case-rangan me·asa baksa me·asani tubrinaniko man·chape me·a me·chik tubrinani a·sel ong·a ine tom·anio dal·batgipa sokgipa ong·e Dr. Cruzie Elmina N. Sangma jinmana aganprakaniko dakangaha. Iani gisepon ua chatro chatrirangko rongtalatgijagipa biji-rangchi tattoo ka·anirangko dakjachina mikrakataniko on·atan baksana sakantikon HIV porikka ka·e nichina, nanga ong·ode ta·rake sana bananiko ra·china aro sanram biaprango bi·sa an·pakaniko dakchinaba ua didiataha.
SP Pawar Swapnil Vasantrao, chatro chatrirangko niamrangko ja·rikchina, krenge kamko ka·china, namako chanchichina aro namako soekchina didianiko on·angskaaha.
Ia manianiko ong·atanio katsusaani, sing·anirangna aganchaksusaani, jatni ring·ani chrokmesaanirang baksana mikrakataniko on·a skit ba dakmesokanirangko ong·atangaha. Me·chikrangni kat·susaanio, Rongrenggre Government Higher Secondary School-oni Raksilchi N. Marak, skanggipa biapko, Martha D. Sangma 2-gipa biapko aro Ritimesa N. Marak 3-gipa biapko man·aha. Indake me·asarangni katsusaanio, Rongrenggre Government Higher Secondary School-oni Salsra N. Sangma, skanggipa biapko man·ani gisepon, Williamnagar Loyola College-oni Pangchak G. Momin aro Sengsram N. Marak, 2-gipa aro 3-gipa biapko man·angskaaha. Ia program-ko ong·atani somoio susaanio chegiparangna mande ra·pilskaanirangko dakangaha.
Na·simang iakoba nina man·gen:
Na·simang iakoba poraina man·gen: Na·tok jile cha·ani songo noko janggi tanganiko tang·dobatatgen : EWKHD DC
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
