Shillong, June 19: Adita salrangna skang, East Jaintia Hills a•jani Lumshnong song samba jolo, mikkarang jimbee waanganichi naptomanggipa aro a•a be•dapgipa National Highway (NH-6) ramako ta•raken taripilna aro dal•dalgipa garirangko watpiltaina jotton ka•enga ine Robibar salo, Meghalaya a•dokni Chief Minister Conrad K Sangma parakataha.
Ia ramao a•arang naptomangani a•sel aro mitam bakrangode a•arang be•dapani a•sel bang•a garirang aro songre songgabatenggipa manderang, ia ramao jachange dongtokna nangahachim ine nikna man•a.
Robibar salo ia biaprangko nieani ja•man kobor ra•timgiparangna talatangengon, ia chu•gimik ramakon taripiltaie garirangko watna jotton ka•enga indiba badiaba biaprangode mikkarang waengkuani a•sel kamrangko ka•anio neng•nikanirangko man•na nangenga ine Chief Minister parakataha.
Ia ramarangona chirang jokbae ramarangko nosto ka•engani gimin chiko dingtang biap gita watna jotton ka•enga ineba ua parakataha.
“Da•o konta 24-ni gisepon ia ramani mitam bakrangkode chinga taripilna man•gen ine ka•dongengani gimin ia rama gita chonchongipa garirangkode watna man•gnok,” ine Sangma aganaha.
Mikkarang komiangahaode kamrangko chu•gimik name ka•na man•gnok ine janapatengon, mikkarang komiangahaode konta 48-oni konta 72-ni gisepon dal•dalgipa garirang aro mongsongbate nangchongmotgipa bosturangko salruraenggipa garirangkoba watna man•gnok ine Chief Minister parakataha.
Chief Minister-ni aganani gitade, ia NH-6 ramako champengatmiting somoirango chonchongipa garirangnade, manderangni baganrang gita dingtang ramako district administration sandienba, watna jotton ka•aha.
Ia ramao jachange dongna nanggipa garirangna aro manderangna pilak nanga dakchakanirangko aro cha•ani ringanirangko sokate on•ahani gimin ua dingtangmancha dingtang dingtang company-rangko, NGO-rang aro gipin dolrangkoba mittelpilangaha.
Ia ramarangko nieani somoio a•dokni Chief Minister baksana, Home Minister Lahkmen Rymbui aro dingtang dingtang official-rangba dongpaaha.
