Tura, June 7: South West Garo Hills a•jani Mahendraganj constituency-ni ning•o donggipa Geghapara Urban Health & Wellness Centre-ko Budbar salo, jolni MLA Sanjay A Sangma-ni jakchi nokdonggae on•angaha aro ia centre-ko nokdonggae on•anganio Zikzak MDC Aktar Ali, Zikzak Block-ni BDO Jayanta Hajong aro gipinrangba dongpae bak ra•angaha.
Ia Health & Wellness Centre-ko nokdonggana gita program-ko ong•atanio South West Garo Hills a•jani District Medical & Health Officer (DM&HO) Dr Himangshu Barman, rimchaksoani kattarangko aganangengon, ia Health & Wellness Centre-ko kulianichi Mahendraganj-ni wilwilao donggipa Nandichar, Geghapara, Paulpara, Daspara aro uandakgipa songni manderangna bang•a namgni ong•gnok ine parakangaha.
Ia Geghapara Urban Health & Wellness Centre-na ambulance bolsako on•gilchina gitaba ua jolni MLA-ko mol•molangaha.
Ia tom•anio Mahendraganj MLA Sanjay A Sangma-ba jinmana aganprakangengon, ia gital Health & Wellness Centre-ko man•ahani gimin jolni manderangna kusi ong•chakaniko parakangenba, ia bilsini December jani gisepon ia centre-na ambulance bolsako on•gen ine ku•rachakaniko on•angaha.
