Imphal, Dec 14: Manipur a·doko jatska jat golmal ong·anio bang·a manderang janggitangtangko gimaataha. Uamangni manggisirangko hospitalni manggisi donramrangon ja 8na kingking donkuengachim. Supreme Courtni rai on·anio pangchake Ma·mong Sorkari aro A·dok Sorkari nangrime ua manggisirangko noktang songtangrangona watatna kam ka·aha. Ua sianggipa manderangba mande ra·e gopako man·na kraa ine Supreme Court rai on·aha.

Pring seng·mikchion manggisangko, sipairangni bilakbee dilkepaniko ra·e, Indian Airforce-ni helicopter-rango Imphaloniko Kuki-Zo manderangan jelbate donggipa Kangpokpi districtona ra·angaha. Apsan daken, Churachandpur districtonaba ra·angna kam ka·enga ine sorkarioniko kobor man·aha.

Manipuro so·sojengjeng ong·anio sigipa bon·gipa manderangni manggisirangko kra-bewalo mande ra·e gopna on·atchina gita November jani 28 tariko Manipur a·dok sorkarina Supreme Court ge·etaniko on·aha. Manipuro so·sojengjeng ong·anichi sigiparangko mande jat ine chane kam ka·china gita Supreme Courto dingtangmancha committeeko August 7 tariko songaha. Ua committeeko Justice Gita Mital dilaha, aro committeeni report on·anio pangchake Chief Justice D.Y. Chandrachud baksa Justice J.B. Pardiwala aro Justice Manoj Misra a·dok sorkarina ge·etaniko on·ataha.

Committeeni report on·ani gitade sak 175ni manggisirangko a·doko gopgija so·gija indaken donengachim. Uarangoniko sak 169 manggisirangni be·en nokgiparangkode u·itoka. Uoni sak 81ni manggisirangkode mahari ma·drang ra·angna kangaha, sak 88ni manggisirangkode kangegipa gri; sak 6ni manggisirangkode be·en bikap nokgipa u·ijaha.

Ua manggisirangko so·e aro gope galna Manipur a·dok sorkari dam 9 biaprangko ra·chakaha. Indiba manggisirangko mahari ma·drangni ra·chaksogniko civil societyrangni beng·e dona gnangchim ineba reporto janapaha.

Iakoba poraie nina man·gen: Sima-ari ga·bate mongma kal·aka: South Garo Hillsni saksa saknaa man·a, uko Ampati Civil Hospitalona ra·anga.