Guwahati, Dec 27: Mawsynram jolni wa•griprango u•ikugijagipa fungus-ni rokomko man•enba Meghalaya-o man•giminrango see rakkigipa scientific record-o gital rokom aro gital genus-ko man•aha.
Ia fungus-ko Khasi Hills-oniko man•ani gimin Padasynnemellisia khasiana ine mingaha aro uko July 2017 bilsirango burungrangona re•e am•sandianirangko dakani somoio sie soangenggipa wa•arangoniko man•aha. Ia fungus-ni bidingo talatanirangko Phytotaxa-o chapa ka•aha, jean kingsa international journal ong•a, aro uandaken a•doko man•gipa bang•a u•ikugijagipa rokomrangni fungus-rang dongengkua ine parakata.
Ia am•sandianirangko scientist-rang J. Pratibha-ni dilanichi man•aha aro uno D. Jayarama Bhat, Turki M. Dawoud, aro Ashish Prabhugaonkar bak ra•aha.
Am•sandigipa scientist-rang Mawsynram jolo wa•arangni gimin sandianiko dakengmitingo ia fungus-ni rokomko bu•su gnanggipa wa•a rokomsaoniko (Chimonocalamus griffithianus) man•aha. Nikchengode, ia fungus-ko soangenggipa wa•ao sko chone chone chaa gita nikachim aro iarangko burung dikgipa, mikka jime wae sosikamgipa burungrango nikchangrongachim.
Microscope-ko jakkale nion, ia fungus una skang nikgimin mamung janapgimin fungus-ni rokom baksa melija ine mesokaha.
Laboratory-o nie aro DNA sequencing-ko ka•e nion, ia fungus dongsogimin mamung rokomoni ong•ja ine namen u•ina man•aha. Uandake, am•sandigiparang gital genus Parasynnemellisia-ko man•aha, jekon P. khasiana ine rokomko seaha.
Ia am•sandianio fungus-ni jat Phaeosphaeriaceae-ni gisepo ia gital man•gimin rokom dingtangmanchagipa ong•a ine mesokaha aro Asia-ni dingtang dingtang biaprango wa•arango chagipa fungus-rang gita dakja ine u•ina man•aha.
Fungus-rang burung-bolgrimrango namen gamchatgipa ong•a maina uara sigimin bol-wa•arang soatna dakchaka. Wa•griprang Meghalaya-o bang•en donga aro iarango bang•a dingtangmanchagipa fungus-ni jatrang donggenchimoba, iarangni bidingo am•sandiani aro see-jote ra•ani dongbreja.
Meghalaya-o mikka jimbeani, ding•chibilani aro wa•grip bang•anichi dingtangmancha fungus-rang chana nama ine senokgiparang janapaha. Iandake am•sandie man•anirangko dakanichi, bang•a gital gital fungus jatrangko man•kunaba donga ine mesoka.
Gital man•gipa fungus-ko India-ni national fungus aro herbarium chimonggiparangona ra•ange doneaha aro ian a•songni scientific record-o dongkamgen.
Am•sandianiko dakgiparang wa•griprangko ripingani gamchatanikoba talatenba, uarangko do•o-matrangnasan ong•aija indiba burung-bolgrimrangko rakkigipa nikna aro u•ina neng•rakgipa bakrangnaba nanga ine aganangaha.
Na·simang iakoba nina man·gen:
Na·simang iakoba poraina man·gen: Krismas manianiko champenggiparangna rakbatgipa sastiko on·china BJP dabia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
