Shillong, Dec 06: Meghalaya State Commission for Women-ni Chairman, Pa P Toi baksana, Social Welfare-ni Director Pa D.D Shira, ge·sa bakkandike tarigipa ‘Kein Noh’ ba ‘Ong·gija kamko dongtongbojok” ingipa jawilwatko Mongolbar salo Shillong-o tom·anio a·bachengate on·angaha.
Ia bakkandikgipa jawilwatko tarina gita, social welfare department dakchakaniko on·aha. Indake ong·engon, National Crime Report Bureau (NCRB)ni parakangani gita, India a·song gimiko me·chikrangni kosako ong·gija dakani kamrang batroroenganichi neng·nikanirangko man·enggipani bidingo iandakgipa jawilwatko tariachi ma·siate on·na miksonganiba ong·jola.
“Nokdang ge·gittamni obostarangni gimin tarigipa ‘Kein Noh ba ong·gija kamko dongtongbojok’ ingipao pangchake chinga ia jawilwatko bikotaha. Ia jawilwato chinga maiko aganna miksongachim uko u·i-ma·sie ra·na ian nigiparangosa pangchakaijok,” ine Pa Toi parakataha.
Salni tom·anio, Meghalaya a·doko segri ma·giparangni songsalo janggi tangani gadangrang aro uamangni neng·nikanirangni bidingo am·sandie porigiminni report-koba on·angjolaha.
