New Delhi, May 18: An•o donggipa bang•bata me•chikrangan COVID-19-ni tikako su•na kenchaktokengani gimin, an•o donggipa me•chikrangba COVID-ni tikako su•e ra•na man•aia indiba man•a dipetde me•chikrang an•o dongna skangan tikarangko su•e ra•na man•ode nambata ine doctor-rang parakataha.
Delhi-o donggipa Akash Health Centre-ni Senior Gynaecologist Dr Madhulika Sinha-ni parakatani gitade, an•o dongani somoio COVID-19 man•genchimode ua an•o donggipa me•chikna namen simsakna nangani ong•a aro me•chikrang man•a dipetde an•o dongna skangan tikarangko su•e ra•na man•ode nambata.
An•o donga ine ma•sijae COVID tikako su•genchimode maiko dakna nanga ine kobor ra•timgiparang sing•on, me•chikrang man•a dipetde an•o dongna skangan tikako su•e ra•na nanga indiba an•o donga ine ma•sijae tikako su•genchimoba jajrengna nangjawa ba bi•sako galna nangjawa maina da•o dipet tika su•anichi an•o donggipa bi•sana nangchakeaniko ra•baani sakkirang dongkuja ine Hyderabad-o donggipa Yashoda Hospital-ni Dr Bhagya Lakshmi parakatskaaha.
COVID-ni tikako su•anichi mikkangchi bi•sa ba•anio nangchakeanirang donggenma ine sing•skaon, COVID-ni tika maming dakeba bi•sa ba•anio nangchakeaniko ra•baja maina me•chikrang bi•sarangko ba•na skangan maming kenna nangani gri tikarangko ra•na man•aia ine American Society of Reproductive Medicine-o ku•pattianiko on•aha ine Dr Sinha talatskaaha.
Apsan daken, Chennai-o donggipa Apollo Cradles-ni Dr G Vishnu Vandana-ba, tika su•anichi bi•sa ba•anio nangchakeaniko ra•baa ine agananiko jegalataha aro ian manderangni tol•e bebera•anisan ong•aia ine talatangaha.
COVID-ni tikako su•anichi me•chikrangni jaanti nikani (menstrual cycle)-naba maming nangchakeani dongja ineba doctor-rang parakataha.
An•o donggipa me•chikrangko tika su•ani bidingo sing•on, da•o dipet an•o donggipa me•chikrangko tika su•anichi nangchakeanirangko mesokna gita maming sakkirang dongkujani giminsa da•o dipet an•o donggipa me•chikrangko tika su•na man•kujaenga ine Akash Health Centre-ni Internal Medicine specialist Dr Parinita Kaur parakataha.
An•o donggipa me•chikrang aro sok kanenggipa me•chikrang tika su•na man•aiama ine sing•on, da•o dipet sok kaenggipa me•chikrangde tika su•e ra•na man•aiaha indiba an•o donggipa me•chikrangko tika su•ani giminde committee aro sorkari name chanchia dongkuja ine National Technical Advisory Group-ni chairman Dr NK Arora parakataha.
Bi•sa an•pakani ja•man me•chikrangko tika su•ani bidingo janapatengon, bi•sa an•pakani ja•mande me•chikrang je somoioba tikako su•na man•aiaha ine Dr Arora parakataha.
